Ang Paraanggidan kang Tawo nga Naduraan kang Kuwarta
ni Mary Joy C. Uniana
May sangka seaman nga masami nagaagto sa manami kag bahul nga simbahan hay marapit dya sa piyer nga durungkaan kang mga barko halin sa Manila. Antes magsakay sa barko pagguwa sa pungsod, kinahanglan na anay magbalik sa Manila para mag-agto sa anang opisina. Gani ginapili na nga magbiyahe paagi man sa barko pa-Manila kag nagahapit anay sa amo nga simbahan para magpasalamat sa grasya nga ana nabaton kag magpangayo kang pag-ubay halin sa Makaako. Halin kang gamay pa tana, parasimba run ang anang panimalay imaw ang anang mga ginikanan kag kabugtuan.
Samtang nagapasulud tana sa simbahan, ginlibot na ang anang panurukan sa bakante nga mga purungkuan, hay ang amo nga simbahan bisan wara it misa, masami nga buta kang mga deboto. Nagdiretso tana sa sangka purungkuan sa diin sangka babaye ang anang tupad nga seryoso kag diretso ang panuruk sa altar. Ginpili na nga magluhod kag mangamuyo nga nagapirung. Igo burubhay, nabatyagan na nga nagluhod man ang babaye. Nagahingapos ang anang pangamuyo kang nabatian na nga nagnguynguy ang anang tupad nga wara man it ginamitlang nga mga paranambitun.
Dalidali tana nga nagguwa sa simbahan hay pira lamang ka minutos mahalin run ang barko nga ana pagasakyan. Sangka sakay sa dyip kag makaabot run tana sa piyer. Kang dali lamang tana manaog, gin-usisa na ang anang bulsa para magbuul kang kuwarta nga barayad sa drayber. Kinulbaan tana kang ang anang kahita wara run. Daw matiyabaw tana kay rugto tanan ang anang kuwarta kag importante nga mga garamitun magbiyahe pabalik sa barko nga anang ginaobrahan.
Nagpakitluoy tana sa drayber nga ang anang kahita nadura. Wara na mapunggan ang maghibi hay pati ang barko nga anang pagasakyan pabalik sa Manila inoghalin run. Nadumduman na ang babaye nga daw amo gid dya kaina maghibi.
Namuypuy ang mga siko nga nagbalik tana sa simbahan kag rugto ipalipas ang mga inoras hay indi man tana lagi makauli sa andang balay. Kinahanglan na pa magbiyahe ka pira ka oras kag wara gid tana it nabilin nga kuwarta. Indi tana kamaan kon ano ang anang himuon. Bahul nga kantidad kag importante nga pagkabutang ang nadura kana. Pati anang mga ATM rugto man sa nadura na nga kahita. Gindayday na ang karsadahun pabalik sa simbahan.
Daw naduraan tana it kapagrus kag diretso nga nagluhod pag-abot na sa simbahan. Nagpamangkutanon tana, “ Andut haw nga kadya pa natabo? Ano lamang ang akun pamilya kadya hay tanan nadura kanakun? Bahul ang akun sakripisyo para madab-ot ko ang akun mga handum.”
Naganguynguy tana nga nagapamasol. Sa tuman na nga kakapoy, naturugan tana sa sangka purungkuan kang simbahan kag wara na natalupangdan nga gabii run. Gamay lamang ang mga tawo sa sulud ka simbahan. Nakita na ang sangka sakristan nga nagapanglimpyo kang altar para sa misa sa rum-an it aga. Nangayo tana kang pabor sa sakristan nga kon mahimo rugyan lang anay tana mapalipas kang gabii sa simbahan.
Pagkaaga, nag-agto tana sa likod kang simbahan sa diin may gripo nga sarang tana kang makapanghilam-os. Nadapugan na ang mahamot nga ginaraha kang kusinera kang mga pari. Nakabatyag tana kang kagutum hay halin pa kahapon nga wara tana it kinan-an. Matunog ang nagaandar nga TV, gani ana mabatian ang ginawaragwag nga balita samtang nagapaagto tana sa gripo. Gulpi tana nga nagpundo kag namati kang balita.
Daw tinakluban tana kang langit kang matapos na mabatian nga ang barko nga dapat ana ginsakyan, nalunod kabii kag haros wara it may naluwas hay nagsarurot dya paidalum sa dagat.
Indi na maman-an kon ano ang ana batyagun. Nagdalagan tana pabalik sa simbahan kag nagsinggit, “Ginuo, salamat ginluwas mo ako! Wara matuod ako it kuwarta pero sigurado makita ko pa dya hay buhi ako kag naluwas sa peligro!”
Hinali may nagtapik kang anang abaga. Nagbalikid tana. Duro run ang mga tawo nga nagapasulud para magsimba.
“To, wara mo ako matandai? Ako kahapon ang babaye nga imong ingud. Pasensiya gid hay gingasto ko ang imo kuwarta sa pagpaopera kang akun bata hay naglupok ang anang appendix. Man-an ko, Toto, nga sala ang akun ginhimo pero wara run ako it maparapitan nga mabulig kanakun. Salamat sa Ginuo, wara na ako ginpabay-an. Ginpamatian na ang akun pangamuyo. Duro gid nga salamat!”
Gintadya kana kang babaye ang nadura na nga kahita. Wara run it sulud nga kuwarta ugaring kumpleto ang anang mga pagkabutang. Wara na mapunggan nga maghakos sa babaye.
“Duro gid nga salamat sa pagluwas kang kabuhi kang bata mo hay naluwas man ang kabuhi ko sa kataragman. Salamat sa Ginuo hay sa nadura nga kuwarta, darwa ka kabuhi ang nasalbar na.”
- Katapusan -