Ang mga Baganihan sa Panahon kang COVID-19
ni Jessie N. Monsale
“Kanimo, O mahal nga Ginuo, ginaampo namun ang amun kaluwasan kag kang bug-os nga kalibutan.”
Huod, mga abyan, kon atun handurawon ang coronavirus disease kang 2019 (COVID-19) nga naghalin sa siyudad kang Wuhan, probinsiya kang Hubei sa Tsina kang Disyembre tuig 2019, siguro duro kanatun ang nagakabig nga dya sara ka bangungot. Duro ang gusto makabugtaw, makamarasmas nga dya damgo lamang. Ang tanan ayhan pagtiraw nga pagbuut kang mahal nga Diyos?
Duro ang mga nagmarasakit, nawad-an kang mga obra, nagdalang kang mga kwarta, nagutuman kag mga nagkaramatay. Gani ang pandemya, reyalidad nga dapat atubangun, batuan, kag sulbarun halin kang una asta sa tulad nga panahon.
Kang nagarapuyot ang dya nga pandemya, sa pihak kang kasakitan nga dara na, duro man sa gihapon ang mga baganihan – ang atun mga isigkatawo nga nag-atubang, nagbato, kag nagbulig sulbar kang dya nga kaaway nga indi makita pero traidor kon mag-ataki.
Kang una, suno sa atun maragtas nga kalabanan natun namat-an, ang makabig lamang nga baganihan amo ang naghalad kang anang dugo kag kabuhi. Amo dya ang dikta nga ginpasa-pasa kag ginpatihan nga taraksan.
Apang sa sitwasyon kang COVID-19 nga pandemya, ang mga baganihan amo ang atun mga scientists, laboratory researchers, frontliners, doktor, nurses, medical aides, pharmacists kag ang tanan sa mga balay-burulngan kag mga pharmaceuticals. Mga nagpulaw-bugtaw sa pagrisgo kang anda kaugalingun agud makatukib kang bulong kag makaserbisyo sa mga biktima kag naperwisyo.
Iabay man natun ang mga lideres, opisyales, kag mga obreros halin sa local, nasyonal, kang internasyonal nga panghimanwa sa bug-os nga kalibutan. Mga ahensiya kag ana nga mga tinawo halin sa ehikutibo, lehislatibo, hudikatura, ukon ano pa man nga mga nakagakalain-lain nga sanga kag sistema kang gobyerno. Sanda ka dya ang mga wara nag-untat sa pagbalay kag pagpatuman kang mga pagsurundan para mapahagan-hagan ang halit kang makamamatay nga balatian. Atun pasalamatan ang tampad kag sinsero nanda nga pag-alagad. Amo dya ang nangin barasehan kang katawhayan kang mga pumuluyo.
Indi man malipatan ang mga bulig kang mga non-government agencies and civil society organizations, ridya kag sa guwa kang pungsod, mga grupo nga may tinutuyo nga magbulig para sa kaaraydan kang tanan ilabi run gid sa tiyempo kang global emergencies. Sanda ka dya ang wara ti pagkataka nga nagpangita kang mga pundo, donasyon, relief goods, mga bulong, kag medical cash assistance nga ginpanagtag ilabi run gid sa mga kubus kag pigado.
Ang tanan nga mga relihiyon kag sekta wara man nagpabaya sa pag-atipan kang anda mga tumuruo. Nangin nanay nga nagbatiti kang mga inanak nga hamili. Anda gintatap ang lawas kag kalag kang tanan – sa mga nagakabuhi ukon sa mga nagkaramatay run. Nagpadabdab kang pagtuo, nagpabakud kang pagsarig, kag nagpatubo kang paglaum nga ang tanan malumpuwasan sa natalana nga oras.
Gani idugang man natun ang atun nga kaugalingun, nga sa pihak kang dya nga mga pagtiraw, padayon nga nagapakigbato sa pag-usoy kang mabato nga dalanun ukon pagpanakayun sa mabalud nga dagat kang kabuhi. Raku kita nga mga baganihan sa palibot, wara ti lugar sa atun ang mga kataga nga “wara takun ti labut.” Ang bug-os nga pinsar amo ang magbulig sa atun tubtub masarangan, gani makabig gid nga mayad nga batasan nga daw sa rosas nga maamyun. Kita mga baganihan, may paghigugma kag pagkabalaka sa tanan nga tinuga.
Sa akun nga pagbalikid kang ang kalibutan daw nag-untat sa paghulag bangud kang COVID-19, ang mapait, maaslum, kag malas-ay nga pagtiraw nga dara na, bangud sa mga nagakalainlain nga bayhun kang mga baganihan, natimpla kag ang tanan daw may katam-is run kang muscovado nga kalamay.
Sa kadya nga punto-de-vista, buut ko gid nga ipaathag nga ang mangin baganihan wara ti ginapili nga tiyempo, wara ti natalana nga lugar, wara ti ginapasulabi nga tawo. Makumparar sa mga brilyante – ginbaid, nag-inggat, ginpatimgas kang pagtiraw kang mga element – nga mahal ang bili ukon mahambal ta nga priceless.
Ako nga nagsulat kag ikaw nga nagabasa, kita mga bagani sa tulad nga new normal, mga survivors sa halit kang pandemya, labaw sa mga gintuga, pinakamahal kang Makagagahum. Gani, kita padayon nga magapangamuyo para sa mga nga nagkaramatay, sa pagbulig sa mga nagakinahanglan, kag sa pag-atubang nga may paglaum sa ano man nga magaabot sa kada adlaw.
“Dayawon natun ang gugma kag kaluoy kang mahal nga Diyos sa gihapon.”
- Katapusan -