Nasikagan nga Damgo
ni Mark Anthony Q. Orquejo
Duro nga mga pagkaun kag marahalun nga mga irimnun ang nakabutang sa sangka malabug nga lamisa sa atubang ni Pagal.
Si Pagal sangka hangaway nga nagpirde sa sangka kapre nga lawid run nagahalit sa mga pagkabutang kang hari ilabi run gid sa anang mga bulawan. Bilang pagpasalamat sa kaisug nga ginpakita ni Pagal, ginhimo tana nga kapitan kang mga suldado kang hari kag kana ginsarig ang bug-os nga manggad kang ginharian.
Sa sangka pagmisuk, gulpi nangin matawhay ang kabuhi ni Pagal. Ang tanan na nga kinahanglan lagi-lagi ginatugro kag ang pagtahod kang mga pumuluyo wara ti kabudlay nga nabuul ni Pagal. Ginkilala tana nga isara sa mga pinakaimportante nga personalidad, pangarwa lang sa hari. Kag sa amo dya nga balita, gindumtan tana kang reyna kag gusto tana ipapatay.
Pira ka adlaw ang nagligad, ang ginharian ginsalakay kang mga pirata. Pero antis sanda makasulud sa salsalun nga pwerta kang palasyo, pirang nahut run lang ang nabilin kananda. Si Pagal, bilang kapitan kang mga suldado, nag pahimo gali kang maduro nga mga tigalbong sa palibot kang palasyo. Gamay lang ang nausik sa mga baslay kang pana ka mga suldado hay kalabanan sa mga pirata nahulog sa tigalbong.
Nagdugang pa gid ang pagbilib kang hari kay Pagal kag gintugruan tana kang titulo nga prinsipe kang palasyo hay ang hari wara ti kabataan. Nagdugang run gid ang bukal kang dugo kang reyna kay Pagal. Halos adlaw-adlaw ginasumpa na si Pagal nga mapatay.
Bilang prinsipe, nangin mabinuligun si Pagal sa obligasyon kang hari sa mga katawhan sa ana ginharian. Nagin mayad kag mabuut si Pagal sa mga tawo kag bilang balus ginpalangga gid tana kang mga tawo. Sangka bes, nakita kang reyna si Pagal nga nagaimaw sa hari libot-libot sa palasyo. Sa anang pinsar, indi na dali-dali mapatay si Pagal hay tungud maabtik dya manilag. Gani sa huna-huna kang reyna, ang hari run lang ang anang patyun paagi sa hilo, hay kon sa oras nga matabo ang ginaplano na, nakasigurado tana nga si Pagal ang pagahan-an.
Ginplastar kamayad kang reyna ang anang plano. Nagpahiwat kang punsyon ang reyna para sa hari. Duro ang mga bisita ang gin-imbitar sa nagkalian-lain nga ginharian. Kang nag-umpisa ang okasyon, ginlihog kang reyna si Pagal nga darhan kang pagkaun kag paborito nga irimnun ang hari sa anang lamesa. Bilang pagtaha sa reyna, ginsunod dya ni Pagal nga may yuhum.
Gindara ni Pagal ang pagkaun sa hari kag naghambal, “Mahal nga hari, ang dyang pagkaun naghalin sa mahal nga reyna. Sa pagdawo ko kadya, may nabatyagan ako nga kaugut halin sa reyna, bukut tungud kanimo kondi kanakun. Nagakahadluk ako nga basi sa pagkaun mo kadya may kun ano nga matabo kanimo. Makasiguro ako kang mayad mo nga kahimtangan kon islan ko dya nga pagkaun.”
“Indi run kinahanglan,” hambal kang hari. “Tawga ang reyna nga mag-agto rugya kag imawan na ako sa pagkaun kang dyang mga pagkaun.”
Ang reyna napiritan nga mag-imaw kaun sa hari para mapakita nga inosente tana, pero antis sanda magkaun ang hari may ginhimo nga anunsyo.
“Ang kadyang gabii,” ang umpisa kang hari, “ang urihi nga gabii para kanamun. Kon ano man ang matabo kadya, sa masunod nga adlaw, ang gahum ko bilang hari ninyo ginatugro ko kay Pagal. Nagapati ako nga ang dyang kaharian mas mangin mabaskug pa sa duro pa nga mga tinuig.”
Kag dayon ang hari nagkaun kag nag-inum kaimaw kang reyna. Napatay sanda sa atubang kang andang mga katawhan. Sa pag-abot kang aga, gintugruan nanda kang katumanan ang mando kang hari parti kay Pagal. Naghiwat sanda kang seremonya sa pagkorona kay Pagal bilang bag-o nga hari.
Kang hana run nga itungtong ang korona sa ulo ni Pagal, gulpi lang naglinug. Gulpyada lang si Pagal natapungawan. Gin-uyug gali ni nanay na ang anang katre hay adlawun run kag si Pagal wara pa kahimus para sa pamahaw kag urihi run tana sa klase. Nautod ang pantasya nga damgo ni Pagal.
- Katapusan -
* Litrato: Halin sa http://www.rottentomatoes.com/quiz/the-thomas-crown-affair-quiz/.