Masubu nga mga Tinaga ang Masulat ko Kadya nga Gabii
(Puedo Escribir Los Versos Más Tristes Esta Noche ni Pablo Neruda)
Ginlubad sa Kinaray-a ni Anna Cecilia R. Pefianco
Masubu nga mga tinaga ang masulat ko kadya nga gabii. Masulat ko, angay kang, “Ang kagab-ihun nabuta kang malapintuk nga kasanag kag ang mga bituon sa marayu ginakunupan kang maramig.” Nagatuyub ang hangin sa kalangitan kag nagaamba. Masubu nga mga tinaga ang masulat ko kadya nga gabii. Ginhigugma ko tana kag kon kaisa ginhigugma na man ako. Sa mga kagab-ihun nga kaangay ka dya, ginhakus ko tana kang mahugut. Ginharukan ko kang malawig sa idalum kang malapad nga kahawaan. Ginhigugma na ako, kag kon kaisa ginhigugma ko man tana. Paano malikawan palanggaun ang anang napagkit nga mga mata. Masubu nga mga tinaga ang masulat ko kadya nga gabii. Sa pagpanumdum nga wara ko tana naangkun Sa pagbatyag nga ginbuy-an ko tana Sa pagpamati kang malapad nga kadulum nga nangin mas madulum hay wara tana sa ingud ko. Kag ang mga tinaga nagtupa sa bug-os nga pagkatawo pareho kang tun-og sa kaumahan. Ti, ano kon ang akun gugma nakahilway kana Ginsumpa ang amo to nga gabii kag wara tana sa tupad ko. Amo lang dya. Sa marayu, may nagaamba. Sa marayu. Ang akun kalag nagakauhaw gihapon nga nadura tana kanakun. Ang akun panurukan nagakakunyag nga nagapangita kana. Ang akun tagipusuon nagakahidlaw kana, kag wara tana sa tupad ko. Ang amo man nga kagab-ihun, nagaiwag sa amo man gihapon nga mga kakahuyan. Kita, sa amo to nga tion, naglain run. Wara ko run tana ginapalangga, amo dya ang pat-ud, Pero daw ano ko tana ginpalangga. Ginkapkap ka limug ko ang hangin nga tandugun ang anang pamatin-an. Angkunun run tana kang iban. Pareho ka akun mga haruk kato. Ang anang limug, masinaw nga lawas, kag ang anang mga mata. Wara ko run tana ginapalangga, amo dya ang pat-ud, Pero basi palangga ko man tana gihapon. Ang paghigugma tuman ka dali, ang pagbiya, malawig. Hay sa mga kagab-ihun nga ginkunup na ang akun mga hakus, Ang akun kalag nagakauhaw gihapon nga tana nadura kanakun. Bisan pa nga amo dya ang urihi nga kasakit nga anang ginapaantos kanakun kag amo dya ang katapusan nga mga tinaga nga ginsulat ko para kana. |
***