Masadya nga Pagpamuno kag Pagtudlo
ni Jesus C. Insilada
Matapos ang haros isa ka semana nga pag-uran bangod sa pag-igu ka bagyo sa atun pungsod, nagtabok ako pa-Siyudad ka Bacolod para sa isa ka pagtiriripon ka mga manunudlo nga bag-o nakasulod sa Departamento ka Edukasyon. Medyo mabalud pa ang dagat kag ginturog ko na lamang ang paglingin kang akon ulo. Bag-o ang adlaw ka okasyon, tuya run kami nga mga imbitado nga manoghambal para sa isa ka sinapol kag agod mahandaan ang talk show nga amon pagapasakupan.
Isa lamang ka adlaw nga seremonya para sa pagbaton sa bag-o nga mga manunudlo apang bangod ginduho sanda nga naghalin pa sa nagkalainlain nga bahin ka Bisayas Nakatundan sa duha ka grupo, nangin duha man ka adlaw ang amun pagtambong agod magpakigbahin ka amun inagihan kag mga painoino nga makatao inspirasyon sa mga manunudlo. Ang mga nagpasakop indi lamang mga bataon nga mga manunudlo bangod may dyan kami nga nakilala nga nagbuhay sa pribado nga eskwelahan, nagtrabaho sa luwas ka pungsod, ukon indi gani, halin sa iban nga patag sa trabaho ukon ahensya sa gobyerno.
Apat kami tanan nga mga bisita sa talk show -- duha ka classroom teacher, isa ka principal, kag ako nga bag-o lang nagsaka ang rangko bilang district supervisor. Nanarisari ang amun mga adbokasiya kag inobasyon para sa edukasyon nga nakabulig agod mapasanyog ang edukasyon sa amun tagsa ka eskwelahan ukon cluster of schools nga nasakupan.
Akun ginpakigbahin kag ginpaathag ang tuhoy sa Resilient and Happy Leadership (RHL) bilang ginaduso nga modelo sa pagpamuno ka eskwuwelahan kag pagdumara ka mga manunudlo. Ang ginapakilala nga modelo gin-angot sa MATATAG Agenda ni Bise Presidente Sara Z. Duterte kag amo man ang tiglikum tulad ka DepEd.
Ang MATATAG Agenda may apat tanan ka marahalun nga mga bahin:
- Una, ang pagturuk sa kurikulum nga K to 12 kag pagtao ka mga panugyan agod mapataas ang kalidad ka mga gradweyt agod sanda mangin handa para sa trabaho kag mangin aktibo kag responsable nga pumuluyo;
- Ikaduha, ang pagtuon kag pagpatuman ka mga pamaagi kag polisiya agod mapadasig ang mga proseso sa pagdul-ong ka mga kinahanglanon nga mga pasilidad kag mga serbisyo;
- Ikatlo, ang pagtipig sa mga tumuruon paagi sa pagprotihir sa anda mga kinamatarong kag mayad nga kahimtangan, ingklusibo nga edukasyon, kag pagtuo ka positibo nga palibot sa anda pagtuon; kag,
- Ikaapat, ang pagtao ka suporta sa mga manunudlo agod sanda makatudlo ti mayad.
Ang RHL nagatao ti pokus sa dya nga mga bahin bilang kritikal nga components ka pagpamuno nga may mapag-un nga pagpati sa pagbinuligay, bukas nga komunikasyon, kag positibo nga paglantaw sa mga sitwasyon kag bagay-bagay agod ang mga ginadumara nga mga manunudlo, makakita ka kahulugan kag kalipay sa anda pagtudlo.
Sa panahon tulad nga ang mga manunudlo nagalagas ka tion agod mapun-an ang nadura nga mga kahigayunan nga natudlo daad sa mga bata ang kinahanglanon nga mga leksyon kag mga ikasangkol apang bangod sa pandemya, may nalaktawan nga mga pagtuon nga nagdulot ka indi manigar nga pagnubo ka kalidad ka edukasyon sa sulod masobra duha ka tuig diin nagtuon sanda pinaagi sa blended learning.
Nagakinahanglan ang mga manunudlo ka suporta agod epektibo nanda nga matungdan ang anda pagtudlo tulad nga nagbalik run ang mga bata sa mga eskuwelahan. Nagakinahanglan ang mga manunudlo ka istilo ka pagpamuno nga nagatao kananda ka ligwa, motibasyon, kag pagtib-ong sa anda pagtudlo ilabi dugid sa literacy kag numeracy nga kinahanglan gid taw-an it importansya sa pagpatuman ka learning recovery program.
Nangin masadya kag mabinungahon ang amon gintigayon nga talk show. Nanarisari ang amun mga personalidad, adbokasiya, kag mga pamaagi sa pagsaysay ka amun tagsa ka topiko dugangan pa nga sagad ang duha ka host magpadalagan ka programa gani nangin masinadyahon kag makahulugan ang yadtong paghinun-anon sa entablado.
Bilang hingapusan ko nga panugdaon, ginhingyo ko ang mga manunudlo nga pangitaun ang kalipay kag kahulugan sa anda napili nga propesyon. Nangin pangamuyo ko man sa amo yadto nga mga tion nga ang mga nakabati nga mga puno ka eskuwelahan, nakahangop kag anda magamit ang mga prinsipyo ka RHL sa pagpasad ka komunidad diin masinadyahon nga nagatudlo ang mga manunudlo sa anda masinadyahon man nga mga tumuruon.
Matuod gid nga sa kabuhi natun bilang mga manunudlo, nagaabot gid ang bagyo ka mga pagtiraw apang kon kita may mapag-on nga pagpati nga dya magalipas lamang kag kon kita may positibo nga disposisyon, magapabilin kita nga may kalipay kag kapag-on sa paglambot ka atun mga tinutuyo para sa edukasyon kag para sa atun pungsod.
- Katapusan -