Mga Bisita
ni Maria Milagros Geremia-Lachica
Suud nga mag-abyan, si Kasubu kag si Handuraw, lukdo ang mga binagtung, nagdulhog sangka adlaw. Wara ginsagda, wara ginpaabot, wara’t pamaan, naghukmung sa tagbalay, si Dughan nga nangusyan. Nagsaro sanda sa pagkaun, nag-imaw kay Dughan, sa pagsalup kang adlaw kag sa pagmura kang bulan. Sa pagturog anda gin-ukay dara nga binagtung, kag ginhumlad malapad nga banig kang kahapon. Sa ulunan ka raad sanda nagbatang sa pagdihon, ginsaysay mga sa rum-an nga sa pagkabilidhun. Ugaring sa pagkaramig dapya kang paraabuton, gani sanda nanimuron sa kapay kang pagkanugon. Kaduro ka mga pagbilog ka bulan nasaksihan, padayon humlad, lulon, humlad banig kang kahapon, daw nawili gid ang mag-abyan sa balay ni Dughan. Sangka adlaw, naghuyup wara ti dinahum-dahum, mabaskug nga buhawi, si Panahon. Si Kasubu gindagit, nakahingagaw singgit, “Abyan, andam!” Si Handuraw naghakus sa harigi kang paglaum kag kay Dughan nagpabilin, bisita nga halangdun. |
***