Alibangbang nga Wara ti Pakpak
ni Edison Mallorca Otañes
Una nga Padya 2013
Sa bulan kang tagburuskag kang mga kabulakan, ang bilog nga ginharian kang mga alibangbang, imbes magsinadya, nagakasubu sa pagtaliwan kang anda mabuut nga reyna. Sa likod kang kasubu, si Elaya, nga sangka prinsesa, likum nga nagakalipay tungud sa mabugu nga tinion, tana run ang pagakoronahan nga manogpanubli kang trono kag ang mangin bag-o nga reyna kang mga alibangbang.
Nag-abot ang adlaw kang pagtiriripon kang tanan nga alibangbang agud makita ang bag-o nga reyna. Suksok ang korona nga dyamante kag ang pakpak nga gabadlak sa kaputi, si Reyna Elaya naghugpa sa ana trono. Ang tanan nagdayaw kag nagluhod sa katahum kang reyna kag ang tanan nagtanyag kang anda dara nga regalo para sa bag-o nga reyna. Si Reyna Elaya naghambal kang ana pinakauna nga kasuguan.
''Ang adlaw kang akun pagpungko bilang reyna, mangin adlaw kang kasadyahan. Ang tanan nga alibangbang akun ginaagda sa pagtambong kada tuig agud magtugro kang anda pinakanami nga regalo. Ang dya nga mando pagasundon kang tanan umpisa kadya tubtub sa katapusan.''
Pagkaligad kang sangka tuig, nagtiriripon liwat ang tanan nga alibangbang dara ang pinakabilidhun nanda nga halad para kay Reyna Elaya. Ang palibot kang trono daw mabuta kang mga nagatumpok nga regalo nga may sari-sari nga kolor, korti, kag kabahulun. Ang pinakabahul gid ang ana una nga ginbuksan. Pagkakita kang sulud na kadya nga mga prutas, laswa, kag mga pagkaun para sa mga alibangbang, dayon na ginsugo ang ana suldado.
“Bul-a dya sa atubang ko kag idamog sa mga ulod kag subay.”
“Matuman, mahal nga reyna,“ ang sabat man kang ana ginsugo.
Padayon na nga ginbuksan ang tanan nga regalo tubtub nga ang pinakagamay run lang ang nabilin. Ginbuksan na dya kag nag-igpat sa ana atubangan ang mga brilyante nga nagakaangay gid sa ana korona kag pakpak. Gulpi na dya ginpahabug kag naghambal.
“Wara ako ti nakita nga regalo nga nagpasadya kanakun.''
Sa adlaw kang kasadyahan, ang tanan nag-uli nga may kasubu.
Sa pagligad pa gid kang sangka tuig, ang tanan naghalad sa reyna, kag ang reyna nagpili kang pinakagamay nga regalo. Ana dya ginbuksan kag nagkusmud kang ana nakita ang sangka buhi nga gutok kang pinakahamot nga bulak.
“Suldado, tutdi ang regalo nga dya.”
Paglipas kang mga inoras, naubos na run bukas ang tanan tubtub nga ang nabilin run lang ang pinakabahul nga regalo nga may duag nga pula kag korti-tagipusuon. Ginbuksan na dya ugaring wara tana ti nakita nga sulud magluwas sa sangka mahamot nga papel nga may nakasulat nga mensahe, “Mahal nga Reyna Elaya, ang amun regalo indi masukol, indi mabakal, kag indi makita ugaring imo mabatyagan. Amo dya kabahul ang amun pagpalangga kanimo.''
Imbes malipay, ginkumus ni Reyna Elaya ang papel. “Wara ako ti nakita nga regalo nga nagpasadya kanakun.''
Nangin paraligban kang tanan kon ano gid ang makapalipay sa anda reyna. Sa adlaw kang kasadyahan, ang tanan nag-uli nga may pagkahangawa.
Sa ikatlo nga tuig, tanda nagtiriripon liwat, dara ang anda mga regalo. Ang reyna una nagpili kang pinakanipis nga regalo. Pagbukas na, tana nahangyus sa ana nakita. Nagsampok sa ana panurukan ang ana maambung nga itsura kag ang ana pakpak nga gainggat sa kaputi. Ang regalo nga ispiho ana ginlampus kag nagwas-ag dya sa ana palibot.
“Mga suldado, tipuna ang tanan nga mga regalo kag paanuda ninyo sa suba. Nadura run ang gana ko hay wara ako ti nakita nga regalo nga nagpasadya kanakun." Tungud sa ana pagkadismaya, dayon nagmando ang reyna. ''Ang alibangbang nga indi makatugro kang regalo nga makapasadya kanakun, akun pagasilutan.''
Hala, ano gid ayhan ang makapasadya kay Reyna Elaya? Sa adlaw kang kasadyahan, nag-uli ang tanan nga may kahadluk.
Pagligad pa gid kang sangka tuig, ang reyna wara run nagbukas kang mga regalo. Ginlibot na ang bilog nga sinakpan kag sara-sara nga ginhimutadan ang mga nagtambong sa adlaw kang kasadyahan. Abaw, didto na nakita ang nagpamudlat kang ana mga mata kag nagpatumbo kang ana tagipusuon – ang mga pakpak nga daw balangaw ang duag. Wara na napunggan ang ana pagkaima gani dayon tana nagmando.
''Umpisa sa adlaw nga dya, ang tanan nga ginapanag-iyahan kang mga alibangbang, mangin ana run kang reyna. Gusto ko ihalad ninyo kanakun ang inyo pakpak!"
Sa kahadluk kang tanan, tanda amat-amat nagrulupad parayu kag nagpanago. Ang reyna sa ana kaugut, nagmandar sa mga suruguon na nga bul-un kag taguon ang mga nektar kang mga bulak kag mga dahon nga pagkaun kang tanan nga alibangbang.
Sa pagligad kang mga inadlaw, nagutman run ang bilog nga ginharian magluwas sa reyna. Tungud sa kapintas ni Reyna Elaya, nagpakita kana si Rosa Mistikantada, ang diwata kang mga kabulakan.
"Kanimo run ang tanan nga grasya kang Diyos ugaring wara ikaw gihapon nakuntento,” ang hambal kang diwata. “Imbes magpasalamat, nangin sangka dalok ikaw nga alibangbang. Tungud sa imo sayud nga batasan, ikaw akun pagatugruan kang leksyon."
Sa sangka kumpas kang diwata, nahimo nga mahigku nga itum ang pakpak kang reyna. Antis madura, nagbilin pa tana nga, “Malubad lang ang sumpa kon may sangka alibangbang ang may kabubut-un nga magtugro kang ana pakpak kanimo."
Ang natabo sa reyna ginkahadluk gid kang tanan. Pero ang reyna, imbes mahadluk, mas nagdugang run gid ang ana kapintas. Ginmanduan na ang ana sangka panung nga suldado nga libuton ang bilog nga ginharian agud pangitaun kag bul-un ang mga duag-balangaw nga pakpak. Ugaring sa kada suksok na kang pakpak nga ana gin-agaw, nagabaylo dya sa kolor nga itum. Abaw, ang tanan nga duag-balangaw nangin mahigku kag maitum nga pakpak! Parehas kang gadaba-daba nga kalayo, nagbahul run gid ang kaugut kag kapintas kang reyna tubtub nga ang tanan na nga sinakpan nagpalagyo kana. Tungud wara run ti gusto mag-imaw kag mag-alagad kana, wara run man ti makaun ang reyna kang mga alibangbang.
Nag-abot ang tyempo tag-ururan, kag nagutman gid si Reyna Elaya. Pero may sangka alibangbang nga nagparapit kag nagtugro kana kang pagkaun – si Hiyas, ang alibangbang nga wara kahalin tungud gin-agawan na kang pakpak. Gin-alagadan na ang reyna bisan wara run tana ti ikasarang maglupad. Daw indi makapati ang reyna nga maluoy pa kana ang ana gindalukan kag ginpintasan. Sangka hitabo nga wara na gid ginhuna-huna kag labaw nga nagtandug kang ana matigdas nga baratyagun.
Nagpadayon ang tag-ururan kag ginguba kang bagyo ang anda palasyo. Sa anda pagpangita kang lugar nga mapasirungan, ginpalid kang hangin si Hiyas, kag nahulog dya sa dalum kang kahoy. Indi magbuhay, madab-ot run kang baha si Hiyas.
"Tabang! Tabang! Palihog tabangi ako, Reyna Elaya,” ang pakitluoy kang alibangbang nga wara ti pakpak. Sa sitwasyon ni Hiyas, nagtubo ang kaluoy sa dughan kang reyna. Gusto na daad buligan si Hiyas ugaring tama gid kabaskug ang hangin. Sa kaluoy kag kabalaka nga nabatyagan, nalipatan na ang ana kahisa sa mga alibangbang, kag nadumduman na si Rosa Mistikantada.
"Mahal nga diwata, palihog pamatii ang ang akun pangabay. Nagahinulsul gid ako sa akun ginhimo sa akun mga kaliwat. Para makabawi sa akun mga kasaypanan, handa ako magtugro kang tanan nga akun para kananda. Gani kabubut-un ko nga ibaylo ang akun pakpak para sa kabuhi kang sangka alibangbang nga gin-agawan ko kang pakpak."
Dayon man ginpamatian kang diwata ang pagpakitluoy kang reyna. Nadura ang ana pakpak kag nagsaylo kay Hiyas. Sa anda pag-unungay kag pagbuliganay, nakaluwas tanda sa halit kang bagyo. Tungud sa ginhimo ni Reyna Elaya, amat-amat nagbalik ang tanan sa malinung kag masadya nga umpisa, magluwas sa sangka bagay – ang ana nga pakpak. Bisan tana sangka alibangbang nga wara run ti pakpak, tana ginkilala, gintaha, kag ginpalangga bilang reyna kang mga alibangbang. Kag amo dya ang nagtugro kana kang matuud-tuod nga kalipay.
Nangin kuntento run si Reyna Elaya sa kon ano ang rugyan kana pero natublag gid ang ana pinsar kang gulpi lang nagsakit ang ana likod kag may nagtubo nga bukol nga nagaparamula. Lipud sa ana pagkamaan, ang bilog nga ginharian nagpangayo sa diwata nga tugruan ang anda pinalangga nga reyna kang duag-balangaw nga pakpak.
- Katapusan -
* Litrato: Himo ni lillyZ halin sa http://www.fanpop.com/clubs/butterflies/images/9482003/title/beautiful-butterflies-wallpaper.
