Padya Dungug Kinaray-a 8 (2014)
Dungug Kinaray-a Inc.
Padya Dungug Kinaray-a 8 (2014)
Giya kag Pagsurundan
1. Ang paindis-indis bukas para sa tanan, magluwas sa mga katapo kang Dungug Kinaray-a Inc. para sa tuig 2014.
2. Ang paindis-indis may tatlo ka kategoriya: (a) Mamugu nga Sugidanun, (b) Sugidanun Pambata, kag (k) Binalaybay.
3. Ang pasakup kinahanglan nasulat sa Kinaray-a, wara nakaagi daug sa iban nga paindis-indis, kag orihinal nga obra kang tagsulat nga wara pa nabalhag sa papel. Indi pagbatunon ang pasakup nga ginlikwat (adapt) ukon ginbadbad (translate) sa Kinaray-a halin sa iba nga linggwahe.
4. Para sa kategoriya nga Mamugu nga Sugidanun, ang tema hilway. Ang pasakup kinahanglan indi magkubus sa pulo (10) kag indi magsobra sa baynte (20) ka panid nga pinaagi sa kompyuter, dose (12) ang kabahulun kang letra nga Book Antiqua, doble ang lat-ang, nabalhag sa papel nga nagasukol kang 8.5x11 purgada kag may sangka purgada ang distansya sa kada binit.
5. Para sa kategoriya nga Sugidanun Pambata, ang tema hilway kag nagakaangay sa mga bata nga nagaedad pito hasta dose (7-12) anyos. Ang pasakup kinahanglan indi magkubus sa lima (5) kag indi magsobra sa pulo (10) ka panid nga pinaagi sa kompyuter, doble ang lat-ang, nabalhag sa papel nga nagasukol kang 8.5x11 purgada kag may sangka purgada ang distansya sa kada binit.
6. Para sa kategoriya nga Binalaybay, ang tema hilway. Ang pasakup kinahanglan nagasakut kang indi magkubus sa pulo (10) kag indi magsobra sa kinse (15) ka mga binalaybay. Ang kada binalaybay indi magkubus sa kinse (15) ka linya.
7. Ang kada tagsulat makasumite kang isara (1) lang nga pasakup sa kada kategoriya.
8. Indi pagbatunon ang pasakup nga may ngaran, ayo, alyas, ukon paratandaan nga nagapakilala sa tagsulat.
9. Ang pasakup kinahanglan ipadara bilang Word file kag kinahanglan ipadara imaw ang nahuman kag pirmado nga Opisyal nga Pormas kang Pagpasakup.
10. Kon menor sa edad nga tagpasakup, ang Opisyal nga Pormas kang Pagpasakup kinahanglan pirmado kang ginikanan ukon legal nga manogbantay kang tagsulat. Ang pormas libre kag sarang mabuul sa www.dungugkinaray-a.com.
11. Ipadara ang pasakup sa email sa admin@dungugkinaray-a.com halin sa Septyembre 1, 2014 hasta antes maglampuwas ang 12:00 sa tungang gabii kang Septyembre 30, 2014 (Pilipinas nga oras). Magabaton kang sabat nga email ang tagsulat bilang pagpamaan nga nabaton ang pasakup.
12. Ang pasakup kinahanglan magtuman kang laye kang gobyerno parti sa nabalhag nga mga butang (printed matters). Ang tagsulat kinahanglan magtuman kang kasuguan nahanungud sa R.A. No. 8293 ukon Kodigo sa Pagpanag-iya kang Kinaaram (Intellectual Property Code). Sa pagsumite kang pasakup, ang tagsulat nagapamatuod nga tana ang nagsulat kag nagapanag-iya kang pasakup. Kon sa urihi masapwan nga nagbutig ang tagsulat, bawiun ang padya kon nagdaug kag pabaydun kang mga damyos kag ginastos sa pagsabat sa paglapas kang laye.
13. Ang tagsulat kang pasakup, magadaug man ukon indi, nagasaylo kang anang pagpanag-iya kag kinamatarung sa anang pasakup sa Dungug Kinaray-a Inc. nga wara ti kinahanglan nga bayad. Dya nga pasakup mangin propyedad kang Dungug Kinaray-a Inc., kag sarang nanda gamitun sa nasari-sari nga mga paagi, buruhatun, kag katuyuan.
14. Ang Dungug Kinaray-a Inc. lamang ang may kinamatarung sa pagpili kang katapo ka Hubon kang Manoghusgar. Ang Hubon kang Manoghusgar may kinamatarung nga indi magtugro kang padya kon, suno sa anda paghukum, wara ti pasakup nga angay padag-un. Ingkaso nga may magpatas, ang Puno nga Manoghusgar ang mapili kang magadaug halin sa mga nagpatas. Ang desisyon ka Hubon kang Manoghusgar sarado kag indi sarang maapelar ukon maislan.
15. Ang tatlo ka pasakup nga makadawat kang pinakataas nga puntos sa kada kategoriya, magabaton kang masunod nga mga padya: P10,000 kag medalya (una nga padya), P7,000 kag medalya (ikarwa nga padya), P5,000 kag medalya (ikatlo nga padya). Ang kada tagpasakup magadawat kang Sertipiko kang Pagpasakup.
16. Ang mga madaug kag katapo kang manoghusgar pagabantala sa Nobyembre 15, 2014 sa www.dungugkinaray-a.com.
17. Ang kada tagpasakup, nagabaton kag nagasugot nga magatuman sa Giya kag Pagsurundan kang paindis-indis.
18. Ang Hubon kang mga Tagdumara ang may kinamatarung nga magdesisyon sa mga bagay nga wara rugya nasambit.
* Kon may pamangkot, palihog padara kang email sa admin@dungugkinaray-a.com. I-klik ang butones sa idalum para sa kopya kang Giya kag Pagsurundan kag Opisyal nga Pormas kang Pagpasakup.
