Hari Kang Counter Strike
ni Heidebert Paul Otayde
Una nga Padya 2007
Bratatatatataat! Bang! Bang! Bang! Pew! Bang! Bang! Pew! Kazooom! Booom!
Hala! Diin run ang mga kontra man? Ako lamang sara ang nabilin? Diin run si Nonoy kag si Bentong man? Gamay lamang bilin bala ko piro darwa pa ka kontra ang nabilin. Sarangan ko dya. Ako ang numiro uno kanamun. Pyirdihun ko sanda hay ako ang hari rugya.
Hinay-hinay ako nga nagkamang parapit sa bahul nga kahoy kag nagtindug. Ginbuksan ang safety kang armalite kag naglingling sa wala kang kahoy. May terorista nga nagatalikod. May bitbit nga kutsilyo. Gin-asintar ko ang armalite sa kontra. Hana ko pitkun ang gatilyo kang pusil, may nahulog nga daw atis sa kahig ko kag … granada! Yaaaah … kaboom!
“Waaah! Ti, ti, ti, diin kaw, To? Diin run ginapabugal mo kaina? Wara! Wara gid,” suya ni Jun, pinakamortal ko nga kontra sa sipal nga counter strike.
“Dayaun kaw man. Darwa pa kamo bilin, tapos ako lang sara. Ti, ano single ta?” sabat ko dayon kana.
Ako gali si Peter Luding, katorsi anyos, second year high school sa ANS sa San Jose. Taga-Sibalom ako. Si Tatay mangunguma lang. Si Nanay kag si Lola manogputo. Darwa lang kami magbugto, ako ang gurang kag si Paneng, libayun ko, grade 6. Paano ako nakalab-ot sa San Jose? Aram daan ako, second ako kang elementary. Huud, tuod ria. Amo ra nga sa San Jose gid ako nag-iskwela biskan pigado ang pangabuhi hay aram kuno ako. Tuod man, section A ako kang first year. Kadya? Aaah … Eeeh ... section F! Ssssh … hipus lang, wara ra kamaan sanday Nanay kag Tatay. Ano abi hay sadya gid mag-counter strike mong. May naman-an man ko. Sagad-sagad run ako magkompyuter kag dasig-dasig ako magpindot-pindot kang keyboard.
Sangka gabii. “Diin kaw naghalin nga bata kaw? Man-an mo kon ano oras run dya? Daw alas kwatro man buhi mo adlaw-adlaw, andut ala syiti run kaw kaabot?” daw gasinggit nga kara ni Nanay kanakun.
“Nag-obra kami pradyek, Nay. Lisud-lisud gid, bi. Ti, buhay natapos,” butig ko kay Nanay.
“Gani man, Nene. Man-an mo man nga aram apo ko,” nagsaligbat si Lola, “kag basi lisud gid man. Ma-honor roll pa ra daan tana pag-gradwasyon. Ako daan masaka kana sa stage. Indi lang pagsapaka si Nanay mo, To. Gina-menopause lang ria.”
“Huud, La, ma-honor roll gid ako kag ikaw ang masaka kanakun sa stage. Pramis”
Indi lang kasara ang pag-uli ko nga gabii. Adlaw-adlaw. Kon indi ala syiti, alas otso run ako makauli sa balay sa sobra ka sipal kang kompyuter. Kon kaisa, wara run ako pagsulud sa klasi agud magtambay lamang sa kompyuteran. Biskan Sabado kag Domingo, gabalik man ako gihapon sa San Jose para magsipal kang counter strike kaimaw kang barkada ko.
Sangka Sabado. “To, pwidi mo ako imawan sa taramanan? Araduhon ta to hay tig-ururan run. Ako lang makaput kang karabaw kag mangalog lang timo,” pasingayun ni Tatay kanakun.
“Indi takun, Tay. Duro pa akun asaynment kag pradyek nga hirimuon. Si Paneng to haw? Wara man to ti obra,” sabat ko kana.
“Aw, ah, akun lang man kung wara kaw ti awat. Huud, ah. Indi ta lamang run kaw pag-imawun. Abat kaw lang didto kon tapos kaw run pradyek mo kar-on, ha?”
“Huud, ah,” ang sabat ko.
Nagpanaw si Tatay sa taramnan. Dalidali ako nag-ilis kag nag-agto kay Nanay para maglisinsya. “Nay, mabalik ko daad sa San Jose kadya. May hirimuon kami nga pradyek. Tag-100 ang aramutan kada sara,” butig ko pa gid kay Nanay.
“Abu! Mahal-mahal gid ra haw? Wara run ti iba nga mas barato gawa haw?”
“Ti, kay para taas grado namun. Kag si mam daan strikta gid magtao grado sa pradyek,” sabat ko kay Nanay nga daw gasungon.
“Ahay, ano bay dya? Kwarinta pisos run lang kwarta ko nga bilin. Ginbakal ni Tatay mo bay kang hilo para sa golden kuhol. Tung-un ta run lang dya. Baynti imo, baynti man akun. Utangun mo lang anay sa klasmeyt mo ang imo amut.”
“Ha? Indi takun dya. Mayha takun mangutang kananda. Hmp! Indi run lang ko magpanaw kon. Andam lang kamo kon indi ko kasulud sa honor roll,” daw gaugut ko nga hambal kag ginlampus ko ang gawang kang kwarto ko.
Naggwa si Nanay sa balay nga galuhaluha ang ana mata. Wara takun ti labut basta kinahanglan ko makabalik sa San Jose kay may tournament kami sa counter strike kadya. Ako pa man daan ang hari kang counter strike.
“Pssst, To, dali bla rugya,” tawag ni Lola kanakun. “Dya kwarta sanggatos, amot mo sa pradyek mo. Bakal ko ra daad kang bulong ko piro baskug pa man ako kag wara run ako pagmasakit. Unahun ta lang anay imo pradyek. Basta ma-honor roll gid ikaw, ha? Para makasaka man ako sa stage. Gusto ko gid daan magsaka sa stage,” hambal ni Lola kanakun nga daw nasadyahan gid.
“Huud, La. Mapanaw run ako basi maurihi ako kar-on. Salamat gid, La, ha? Babay!”
Yes! May sanggatos ako. Daw ano nga kalipay ang nabatyagan ko samtang gadalagan sa paradahan kang traysikel. Hmmm, baynti kada oras. Lima ka oras nga sipal? Mayad run ra, ah. Ano abi hay mahal-mahal gid ang tag-oras day Pidol mong. Piro ma-champion man kami gyapon, ah. Ako daan ang hari kang counter strike, pahambog ko sa kaugalingun ko.
Matapos ang lima ka oras. “Waaah! Waaah! Manago kaw pa ha! Diin kaw? Diin kaw? Ako dya ang hari! Hahaha! Yes! Champion kami! Champiooon!”
Ala syiti run ti gabii ako nakauli sa balay kag akun nabatyagan nga daw may lain nga nagakatabo sa sulud kang balay namun. Dasig-dasig ako nga nagdalagan paagto sa gawang kag nakita ko si Paneng nga nagahibi sa kilid. Ginsug-alaw ako ni Tatay nga gadali-dali maggwa sa balay.
“Dalia, To! Agtuni si Lola mo. Nakadanlug kaina kag gin-ataki. Matawag ko anay traysikel,” gasala-sala nga hambal ni Tatay kanakun.
“Lola, naano kaw? La!”
“Aw, rugya run gali ang aram-aram ko nga apo. Daw hindi run ako makasaka sa stage haw. Piro indi bali. Makita ta man kaw gyapon nga nagasaka. Ginatawag run ako ni Lolo mo .…”
“La, indi … masaka kaw pa, di bla? Imaw kita masaka. La? Lolaaa!
Nagpanaw si Lola, piro indi run guro magbalik pa kanamun. Ang sanggatos nga gintugro na kanakun, para daad barakal kang bulong na kon atakihun tana, piro sa pagpalangga ginbaylo ang kabuhi para sa pradyek kang pinakaaram na nga apo. Andut kinahanglan pa madura ang isara ka butang para maman-an ang importansya kang sara pa gid nga butang?
“Tay, bugtaw run. Ginpaharab ko run ang karbaw. May tunga sa kahon pa kita nga araduhon.”
Si Toto hari kang counter strike kato, hari kang taramnan kadya.
- Katapusan -
* Litrato: Himo ni Judi Nyerges halin sa http://www.whidbeylifemagazine.org/?attachment_id=436.
