Ang Atun Handum
ni Eduard V. Cepeda
Ikatlo nga Padya 2009
Pagsulat nga Bahin
Ang mabakud nga nasyon nasandig sa anang katawhan, ang katawhan nga may paghiriusa, pagpalangga, kag pag-ulikid sa anang banwa. Banwa nga nagahimud-us sa kapigaduhon agud maangkun ang kauswagan kag katawhayan. Katawhan nga may paghiriugpong agud ang damgo kang tagsa-tagsa maagum. Dya tanan mapatigayon kon ang lideres kang atun banwa, probinsya, ukon nasyon may pag-ulikid kag pagdampig sa anang banwa nga pinalangga.
Sa paraabuton nga Mayo tuig 2010 nga eleksyon, kita magahiwat kang pagpiniliay halin sa pamunuan nasyonal tubtub sa pinakamanaba nga opisyales lokal. Sa dya nga pagpiniliay atun liwat masaksihan ang mga nasari-sari nga modus operandi, istilo kang atun mga pulitiko para mahaylo nanda ang atun boto. Atun liwat makit-an ang mayad nga panimuut kang mga pulitiko sa atun katawhan, kag ang pagpanghaylo sa mga tawo nga sanda ang nagakadapat ibutang sa pwesto. Ang pagpiniliay sangka kahigayunan kon sa diin atun ginapakita kag ginapabutyag ang atun katungdanan bilang sangka Antikenyo kag Pilipino. Sa dya nga hiriwatun atun makit-an ang pag-ararangay kang mga imol kag manggaranun. Kita tanan magapili kang atun mga lideres nga magatib-ong kanatun sa atun mga handum agud makatibawas sa kaimulon.
Kon atun balikan ang pira ka pinanid kang atun kasaysayan, katorse ka presidente ang nagdumara kang atun nasyon umpisa sa pag-agum natun kang kahilwayan sa mga Katsila, sa pag-abot kang mga Kano, sa pagsalakay kag pamigus kang mga Hapon, nanari-sari nga mga handum, panan-awan, kag bag-o nga paglaum para sa atun nasyon ang ginahimud-usan natun nga angkunun. Pero masobra run sa sangka gatos ka tuig ang nagligad umpisa kang kita nahilway sa pagpamigus kang mga sakun nga dumuluong, sa gihapon ginahandum natun ang kauswagan kag ginapangita ang kahilwayan.
Sa kadya nga panyimpo mahambal mo bala nga ikaw, ako, kita tanan may kahilwayan? Mahilway kaw bala sa pang-abuso, pamigus, kag pangwaslik-poder kang mga pulitiko? Mahilway kaw bala sa pagpangdaya kang magaruk nga pagdumara? Mahilway ka bala sa kagamo nga ginatuga kang pulitika? Mahilway kaw bala sa pagpili kang imo kandidato? Ukon nasilaw kaw sa malabrilyante nga sanag kag makatiringil nga lagting kang kwarta? Tubtub san-o kita magapaidalum sa gahum kang mga sakun kag mapinigusun nga pulitiko? Tubtub san-o kita masilaw sa kwarta kang pulitika? Antikenyo, tubtub san-o ikaw makabugtaw sa imo mahamuuk nga katurugon?
Ang adlaw nagabutlak sa nasidlangan, kag sa kada butlak nagapatimaan kang bag-o nga paglaum, paglaum nga kita nga katawhan makabugtaw kag makabangon sa mahamuuk nga katurugon. Antikenyo, may handum kaw bala sa imo pagbugtaw halin sa mahamuuk nga pagturog? May handum kaw bala para sa imo pinalangga nga banwa? Hala, bugtaw, bangon, sadsad, kag magsikad paagto sa kauswagan kag katawhayan!
Ang dya nga paglaum napagkit sa atun tagsa-tagsa ka hunahuna kag paminsarun, nga sa tagsa ka pag-abot kang aga may dara nga pagbag-o, panibag-o nga handum para sa atun kabuhi, banwa, probinsya, kag nasyon.
Sa paraabuton nga Mayo nga eleksyon, sa atun mga alima nasandig ang buwas-damlag kang atun banwa, probinsya, kag nasyon, kag kang paraabuton nga mga henerasyon. Kita magapili kang matimgas nga binhi, binhi kang kabuganaan, binhi nga magatugro kanatun kang sabat sa atun mga pamangkutanun, binhi nga makatugro kanatun kang bag-o nga paglaum.
Ako bilang sangka Antikenyo, wara ti dugo it dumuluong, duna nga Pilipino, nagahamdum kang pagbag-o sa kadya nga paraabuton Mayo 2010 nga eleksyon. Kita magapili kang mayad nga lideres nasyonal kag opisyales local nga may pag-ulikid sa atun mga duna nga manggad, may ikasarang sa pagdumara, mabakas sa pagdara kang kauswagan sa atun probinsya, ginapalabi ang kaaraydan kang katawhan kabaylo ang kaugalingun nga kalipayan, may prinsipyo kag may kapasidad sa pagdara kang pagbag-o, kag ilabi sa tanan, may kahadluk sa Diyos kag isigkatawo.
Indi kita magpahaylo sa mga matam-is mga dila kag promisa kang mga pulitiko. Indi kita magpadara sa kwarta. Indi pagbaligya ang imo boto kay pareho lang ria nga ginabaligya mo ang buwas-damlag kang imo mga inapo. Iindi magpadara sa mga regalo. Butoha ang nagakaangay ibutang sa pwesto nga makadara kang kauswagan kag makatib-ong kang atun handum para sa kaaraydan kang karakuan. Pilia ang matimgas nga binhi, binhi nga magasabwag kang kabuganaan, paghinirupay, mayad nga pagsinarayo, kag mabinungahun nga Antikenyo.
Antikenyo, bangon kita sa pagbag-o, maghimud-us kita sa kauswagan, maghirupay kita, kag maghugpong para maagum natun ang handum. Gani sa maabot nga eleksyon, binag-binagun natun ang nagakadapat, may ikasarang, kag makasabat kang atun mga pamangkutanun kag handum para sa atun probinsya.
Handum mo! Handum ko! Handum natun tanan!
- Katapusan -
*Litrato: Himo ni MasterV3GA halin sa http://www.deviantart.com/morelikethis/369190981?view_mode=2.
