Giya kag Pagsurundan (2015)
Dungug Kinaray-a Inc.
Padya Dungug Kinaray-a 9 (2015)
Giya kag Pagsurundan
1. Ang paindis-indis bukas para sa tanan, magluwas sa mga katapo kang Dungug Kinaray-a Inc. para sa tuig 2015.
2. Ang paindis-indis may tatlo ka katigoriya: (a) Mamugu nga Sugidanun, (b) Sugidanun Pangbata, kag (k) Binalaybay.
3. Ang pasakup kinahanglan nasulat sa Kinaray-a, wara nakaagi daug sa iban nga paindis-indis, kag orihinal nga obra kang tagsulat nga wara pa nabalhag sa papil. Indi pagbatunon ang pasakup nga ginlikwat (adapt) ukon ginbadbad (translate) sa Kinaray-a halin sa iba nga linggwahi.
4. Para sa katigoriya nga Mamugu nga Sugidanun, ang tima hilway. Ang pasakup kinahanglan indi magkubus sa napulo (10) kag indi magsobra sa baynti (20) ka panid nga pinaagi sa kompyuter, dosi (12) ang kabahulun kang litra nga Times New Roman, dobli ang lat-ang, nabalhag sa papil nga nagasukol kang 8.5x11 purgada kag may sangka purgada ang distansya sa kada binit.
5. Para sa katigoriya nga Sugidanun Pangbata, ang tima hilway kag nagakaangay sa mga bata nga nagaidad pito hasta dosi (7-12) anyos. Ang pasakup kinahanglan indi magkubus sa lima (5) kag indi magsobra sa napulo (10) ka panid nga pinaagi sa kompyuter, dosi (12) ang kabahulun kang litra nga Times New Roman, dobli ang lat-ang, nabalhag sa papil nga nagasukol kang 8.5x11 purgada kag may sangka purgada ang distansya sa kada binit.
6. Para sa katigoriya nga Binalaybay, ang tima hilway. Ang pasakup kinahanglan nagasakut kang indi magkubus sa napulo (10) kag indi magsobra sa kinsi (15) ka mga binalaybay. Ang kada binalaybay indi magkubus sa kinsi (15) ka linya.
7. Ang kada tagsulat makasumiti kang isara (1) lang nga pasakup sa kada katigoriya.
8. Indi pagbatunon ang pasakup nga may ngaran, ayo, alyas, ukon paratandaan nga nagapakilala sa tagsulat.
9. Kon minor sa idad ang tagpasakup, ang Opisyal nga Pormas kang Pagpasakup kinahanglan pirmado kang ginikanan ukon ligal nga manogbantay kang tagsulat. Ang pormas libri kag sarang mabuul sa www.dungugkinaray-a.com.
10. Ang pasakup kinahanglan ipadara bilang Word file kag kinahanglan ipadara imaw ang nahuman kag pirmado nga Opisyal nga Pormas kang Pagpasakup.
11. Ipadara ang pasakup sa email sa admin@dungugkinaray-a.com halin sa Siptyimbri 1, 2015 hasta antis maglampuwas ang 12:00 sa tungang gabii kang Siptyimbri 30, 2015 (Pilipinas nga oras). Magabaton kang sabat nga email ang tagsulat bilang pagpamaan nga nabaton ang pasakup.
12. Ang pasakup kinahanglan magtuman kang layi kang gobyirno nahanungud sa nabalhag nga mga butang (printed matters). Ang tagsulat kinahanglan magtuman kang kasuguan nahanungud sa R.A. No. 8293 ukon Kodigo sa Pagpanag-iya kang Kinaaram (Intellectual Property Code). Sa pagsumiti kang pasakup, ang tagsulat nagapamatuod nga tana ang nagsulat kag nagapanag-iya kang pasakup. Kon sa urihi masapwan nga nagbutig ang tagsulat, bawiun ang padya kon nagdaug kag pabaydun kang mga damyos kag ginastos sa pagsabat sa paglapas kang mga layi.
13. Ang tagsulat kang pasakup, magadaug man ukon indi, nagasaylo kang anang pagpanag-iya kag kinamatarung sa anang pasakup sa Dungug Kinaray-a Inc. nga wara ti kinahanglan nga bayad. Dya nga pasakup mangin propyidad kang Dungug Kinaray-a Inc., kag sarang nanda gamitun sa nasari-sari nga mga paagi, buruhatun, kag katuyuan.
14. Ang Dungug Kinaray-a Inc. lamang ang may kinamatarung sa pagpili kang mga katapo ka Hubon kang Manoghusgar. Ang Hubon kang Manoghusgar may kinamatarung nga indi magtugro kang padya kon, suno sa anda paghukum, wara ti pasakup nga angay padag-un. Ingkaso nga may magpatas, ang Puno nga Manoghusgar ang mapili kang magadaug halin sa mga nagpatas. Ang disisyon ka Hubon kang Manoghusgar sarado kag indi sarang maapilar ukon maislan.
15. Ang tatlo ka pasakup nga makadawat kang pinakataas nga puntos sa kada katigoriya, magabaton kang masunod nga mga padya: P10,000 kag midalya (una nga padya), P7,000 kag midalya (ikarwa nga padya), P5,000 kag midalya (ikatlo nga padya). Ang kada tagpasakup magadawat kang Sirtipiko kang Pagpasakup.
16. Ang mga madaug kag mga manoghusgar pagabantala sa Nobyimbri 15, 2015 sa www.dungugkinaray-a.com.
17. Ang kada tagpasakup nagabaton kag nagasugot nga magatuman sa Giya kag Pagsurundan kang paindis-indis.
18. Ang mga tagdumara kang Dungug Kinaray-a Inc. ang may kinamatarung nga magdisisyon sa mga bagay nga wara rugya nasambit.
* Kon may pamangkot, palihog padara kang email sa admin@dungugkinaray-a.com. I-klik ang butonis sa idalum para sa kopya kang Giya kag Pagsurundan kag Opisyal nga Pormas kang Pagpasakup.
