Giya kag Pagsorondan (2017)
Dungug Kinaray-a Inc.
Padya Dungug Kinaray-a 11 (2017)
Giya kag Pagsorondan
1. Ang paindis-indis bokas sa tanan, maglowas sa mga katapo kag nangin katapo ka Dungug Kinaray-a Inc.
2. Ang paindis-indis may tatlo ka katigoriya: Binalaybay, Sogidanun Pangbata, kag Bugu nga Sogidanun.
3. Ang pasakup (entry) kinahanglan nasolat sa Kinaray-a, wara nakaagi daug sa iban nga paindis-indis, kag orihinal nga obra ka tagsolat nga wara pa nabalhag sa papil (sarang mapasakup ang nabalhag online). Indi pagbatonon ang pasakup nga ginlikwat (adapted) okon ginbadbad (translated) sa Kinaray-a halin sa iban nga linggwahi.
4. Para sa katigoriya nga Binalaybay, ang tima hilway. Ang sangka pasakup kinahanglan indi magkubus sa kinsi (15) kag indi magsobra sa baynti (20) ka mga binalaybay. Ang kada binalaybay kinahanglan indi magkubus sa kinsi (15) ka mga linya.
5. Para sa katigoriya nga Sogidanun Pangbata, ang tima hilway piro kinahanglan nagakaangay sa mga bata nga nagaidad pito asta dosi (7-12) anyos. Ang sangka pasakup kinahanglan indi magkubus sa polo (10) kag indi magsobra sa kinsi (15) ka panid nga nasolat pinaagi sa kompyotur, dosi (12) ang kabahulun ka litra nga Times New Roman, dobli ang lat-ang (double-spaced), nabalhag sa papil nga nagasokol ka 8.5x11 porgada kag may sangka porgada ang distansya sa kada binit.
6. Para sa katigoriya nga Bugu nga Sogidanun, ang tima hilway. Ang sangka pasakup kinahanglan indi magkubus sa kinsi (15) kag indi magsobra sa baynti (20) ka panid nga nasolat pinaagi sa kompyotur, dosi (12) ang kabahulun ka litra nga Times New Roman, dobli ang lat-ang, nabalhag sa papil nga nagasokol ka 8.5x11 porgada kag may sangka porgada ang distansya sa kada binit.
7. Ang kada tagsolat makasomiti kang isara (1) lamang nga pasakup sa kada katigoriya.
8. Indi pagbatonon ang pasakup nga may ngaran, ayo, alyas, okon paratandaan nga nagapakilala sa tagsolat.
9. Kon minor sa idad ang tagsolat, ang Opisyal nga Pormas ka Pagpasakup kinahanglan pirmado ka ginikanan okon ligal nga tagbantay ka tagsolat. Ang pormas libri kag sarang ma-download sa www.dungugkinaray-a.com.
10. Ang pasakup kinahanglan ipadara bilang Word file kag ipadara imaw ang nahuman kag pirmado nga Opisyal nga Pormas ka Pagpasakup sa email admin@dungugkinaray-a.com halin sa Agosto 1, 2017 asta sa tungang-gabii kang Agosto 31, 2017 (Pilipinas nga oras). Magabaton ka sabat nga email ang tagsolat bilang pagpamaan nga nabaton ang ana pasakup.
11. Ang pasakup kinahanglan nagatoman ka mga kasogoan kag layi ka gobyirno nahanungud sa nabalhag nga mga butang (printed matters), imaw run ang Republic Act No. 8293 okon Kodigo sa Pagpanag-iya ka Kinaaram (Intellectual Property Code). Sa pagsomiti ka pasakup, ang tagsolat nagapamatood nga tana ang nagsolat kag nagapanag-iya ka ana ginpasakup. Kon sa orihi masapwan nga nagbotig ang tagsolat, bawiun ang padya kon nagdaug kag, dogang pa, pabaydun ang tagsolat ka mga damyos kag iban pa nga mga ginastos.
12. Ang tagsolat, magadaug man okon indi, nagasaylo ka ana pagpanag-iya kag kinamatarung sa ana pasakup sa Dungug Kinaray-a Inc. nga wara ti kinahanglan nga bayad. Dya nga pasakup mangin propyidad ka Dungug Kinaray-a Inc., kag sarang gamitun sa nanarisari nga mga paagi, borohatun, kag katoyoan.
13. Ang Dungug Kinaray-a Inc. lamang ang may kinamatarung sa pagpili ka mga katapo ka Hobon ka Taghosgar. Ang Hobon ka Taghosgar may kinamatarung nga indi magtogro ka padya kon, sono sa anda paghukum, wara ti pasakup nga angay padag-un. Kon may magpatas, ang Pono nga Taghosgar ang mapili ka magadaug halin sa mga nagpatas. Ang disisyon ka Hobon ka Taghosgar sarado kag indi sarang maislan.
14. Ang tatlo ka pasakup nga makadawat ka pinakataas nga pontos sa kada katigoriya, magabaton ka masunod nga mga padya: P10,000 kag midalya kag sirtipiko (una nga padya), P7,000 kag midalya kag sirtipiko (ikarwa nga padya), P5,000 kag midalya kag sirtipiko (ikatlo nga padya).
15. Ang mga tagdaug kag taghosgar pagabantala sa Nobyimbri 15, 2017 sa www.dungugkinaray-a.com.
16. Ang kada tagsolat nagasogot nga magatoman sa Giya kag Pagsorondan ka dya nga paindis-indis.
17. Ang mga tagdomara ka Dungug Kinaray-a Inc. ang may kinamatarung nga magdisisyon sa mga bagay nga wara rugya nasambit.
- Kataposan ka Giya kag Pagsorondan -
* Kon may pamangkot, palihog mag-email sa admin@dungugkinaray-a.com. I-klik ang botonis sa idalum para sa kopya ka Giya kag Pagsorondan kag Opisyal nga Pormas ka Pagpasakup.
