Padya Dungug Kinaray-a 1 (2007)
Dungug Kinaray-a
Padya Dungug Kinaray-a 1 (2007)
Paindis-indis sa Sugidanun
Giya kag Pagsurundan
1. Ang paindis-indis bukas para sa tanan luwas sa mga miyembro kang Dungug Kinaray-a.
2. Ang piyesa (entry) kinahanglan isulat kag ipasundayag sa Kinaray-a.
3. Ang piyesa kinahanglan orihinal nga obra kang manunulat kag wara pa nabantala, sa papel ukon sa internet, ukon ginhuwad sa sinulatan kang iba. Indi pagbatunon ang piyesa nga ginbadbad (translate) sa Kinaray-a halin sa iba nga polong ukon linggwahe.
4. Ang piyesa nga nagdaug sa iba nga paindis-indis antes magsamput ang tungang gabii kang Nobyembre 12, 2007 indi pagbatunon.
5. Ang kada manunulat makapasulod kang isara (1) lang nga piyesa.
6. Ang piyesa kinahanglan indi magsobra sa pulo (10) ka panid nga pinaagi sa kompyuter, doble ang lat-ang, nabalhag sa papel nga nagasukol kang 8.5x11 purgada, kag may tagsangka purgada ang distansya sa kada binit. Ang agi kang sulat sa kompyuter amo ang Book Antiqua, kag ang kabahulon ka letra numero dose (12).
7. Indi pagbatunon ang piyesa nga may ngaran, ayo, alyas, ukon ano man nga paratandaan nga nagapakilala sa manunulat.
8. Ang piyesa kinahanglan ipadara paagi sa email paagto sa dungug@yahoo.com antes magsamput ang tungang gabii kang Nobyembre 12, 2007. Magabaton kang sabat nga email ang manunulat bilang pagpamatuod (acknowledgement) nga nabaton ang piyesa.
9. Ang piyesa kinahanglan ipadara bilang Rich Text Format (RTF) ukon Microsoft Word Document file kag kinahanglan ipadara bilang sakut imaw ang mga masunod:
a. bio-data ukon résumé kang manunulat
b. nahuman kag notaryado nga kopya kang Opisyal nga Pormas kang Pagpasakup (Official Entry Form)
10. Kon menor sa edad nga tagpasakup, ang Opisyal nga Pormas kang Pagpasakup kinahanglan pirmado kang ginikanan ukon legal nga manogbantay kang manunulat. Ang pormas libre kag sarang pangayuun paagi sa pag-email sa dungug@yahoo.com. Ang bio-data ukon résumé kang manunulat wara nagakinahanglan kang pormas kag sarang dya mahimo sa bisan ano nga paagi.
11. Ang topiko ukon tema kang piyesa bukas kag wara ti pili.
12. Ang piyesa kinahanglan magtuman kang patakaran kang gobyerno parti sa nabalhag nga mga butang (printed matters).
13. Ang manunulat dapat magtuman kang laye nahanungod sa R.A. No. 8293 ukon Laye sa Kinaaram nga Propededad (Intellectual Property Law). Sa pagpasulod kang piyesa, ang manunulat nagapamatuod nga tana ang nagsulat kag nagapanag-iya kang piyesa. Kon sa urihi masapwan nga nagbutig ang manunulat, pagabawiun ang padya kon nagdaug. Ang manunulat magabayad man kang mga damyos, binaydan, kag ginastos kang Dungug Kinaray-a sa pagsabat natungud sa paglapas ukon pagpamatok kang laye.
14. Ang tanan nga nagapasakup, nagabaton kag nagasugot sa tanan nga giya kag pagsurundan nahanungud sa dya nga paindis-indis.
15. Ang piyesa pagahukuman paagi sa:
a. Pagsulat (50%)
b. Paglubad (interpretation) (50%)
16. Ang Pagsulat bukas halin sa Septembre 15, 2007 hasta sa Nobyembre 12, 2007. Ang Paglubad pagahiwatun sa Disymebre 28, 2007 sa lugar nga pagabantala sa nagakaigo nga tion.
17. Ang pulo (10) ka piyesa nga nakabaton kang pinakataas nga marka sa Pagsulat amo ang sarang makaabanse sa Paglubad.
18. Ang manunulat kang napilian nga pulo (10) ka piyesa nagasaylo kang andang pagpanag-iya kang mga piyesa sa Dungug Kinaray-a nga wara ti kinahanglan nga bayad, luwas sa padya nga anda nabaton. Dya nga mga piyesa mangin propeded kang Dungug Kinaray-a kag sarang na gamitun sa nasari-sari kag nagakaigo nga mga paagi, buruhatun, kag katuyuan.
19. Ang manunulat kang napilian nga pulo (10) ka piyesa may katungdanan sa pagpangita, pagpili, kag paghanas kang manoglubad (interpreter).
20. Ang Pagsulat pagahukman paagi sa mga masunod nga surundan:
a. Maathag nga pagpabutyag kang panghunahuna (40%)
b. Kabilugan nga arte kang Pagsulat (40%)
c. Orihinal kag kinaugalingun nga ginsulat (20%)
21. Ang Paglubad pagahukuman paagi sa mga masunod nga surundan:
a. Limug: Ang manoglubad kinahanglan magpakita kang abilidad sa bilog nga panglimug, tuno, puntos kag kalidad nga panghambal nga nagasanto sa sinulatan, maathag, mapino nga pagkambyo kang limug ukon tono kag tayuyon ang panghambal. (40%)
b. Baratyagun: Ang manoglubad kinahanglan magpakita kang abilidad sa pagbaylo kang anang baratyagon sa kalipay-kadlaw, sa kasubo-hibi, kaugot-kusmod, ukon kasakit-kurisung, suno sa sinulatan kag makatandog sa baratyagun kang nagapamati kag nagaturuk (40%).
c. Saulado: Kinahanglan saulado kang manoglubad ang piyesa para tayuyon ang pagsugidanun. (20%)
22. Ang kada Paglubad ginalimitahan sa pito (7) hasta sa pulo (10) ka minutos. Kon maglapaw sa termino may bagting nga mabatian. Ang magkabos sa pito (7) ka minutos ukon maglapaw sa pulo (10) ka minutos, pagabuhinan kang sangka porsyento (1%) sa kada minuto nga nagkabos ukon naglapaw.
23. Ginatugutan ang paggamit kang kostyum, mik-ap, praps, kag mga huni kag musika kon makabulig dya sa pagpanami pa gid kang Paglubad.
24. Ang pasunod kang Paglubad ipaagi sa gabutay kang numero antes ang pagpasundayag.
25. Ang Pundok kang Manoghusgar (Board of Judges) may katungdanan sa pagdesisyon nga indi magtugro kang padya kon, sa ana paghukum kag kaaram, wara ti piyesa ukon manoglubad nga angay padag-un.
26. Ang Dungug Kinaray-a ang may katungudanan sa pagpili kang miyembro ka Pundok kang Manoghusgar.
27. Wara ti mapungko nga manoghusga kon may kaangtanan sa pagtudlo kag paghanas kang manoglubad.
28. Ang makabaton kang pinakataas nga marka sa Paglubad tugruan kang medalya bilang “Kampyon nga Manogsugidanun.”
29. Ingkaso nga may patas (tie) sa (a) kabilugan nga marka kang mga piyesa, ukon sa (b) marka kang mga manoglubad, ang Puno nga Manoghusgar (Chief Judge) sa Paglubad ang magapili kang madaug.
30. Ang desisyon ka Pundok kang Manoghusgar sarado kag indi pwede maislan.
31. Ang mga ngaran kang pulo (10) nga manunulat kag miyembro ka Pundok kang Manoghusgar sa Pagsulat pagabantala sa Nobyembre 19, 2007. Ang mga ngaran kang miyembro ka Pundok kang Manoghusgar sa Paglubad pagabantala sa Disyembre 28, 2007.
32. Ang tatlo ka piyesa nga makabaton kang pinakataas nga marka (kabilugan nga marka sa Pagsulat kag Paglubad) ang piliun nga nagdaug, kag magabaton kang mga masunod nga padya, sa Pilipinas nga piso (Php):
a. Primero nga lugar – Php15,000 kag medalya
b. Segunda nga lugar – Php10,000 kag medalya
c. Tresera nga lugar – Php7,000 kag medalya
33. Ang nabilin nga pito (7) ka mga piyesa magabaton kang prempyo nga Php3,000 kada piyesa.
34. Ang napulo (10) nga napilian nga mga piyesa makadawat kang Sertipiko sa Pagpasakup (Certificate of Participation) sa paindis-indis.
