Giya kag Pagsurundan (2016)
Dungug Kinaray-a Inc.
Padya Dungug Kinaray-a 10 (2016)
Giya kag Pagsurundan
1. Ang paindis-indis bukas sa tanan, magluwas sa mga katapo kag nangin katapo ka Dungug Kinaray-a Inc.
2. Ang paindis-indis may tatlo ka katigoriya: Binalaybay, Sugidanun Pangbata, kag Mamugu nga Sugidanun.
3. Ang pasakup kinahanglan nasulat sa Kinaray-a, wara nakaagi daug sa iban nga paindis-indis, kag orihinal nga obra ka tagsulat nga wara pa nabalhag sa papil. Indi pagbatunon ang pasakup nga ginlikwat (adapt) ukon ginbadbad (translate) sa Kinaray-a halin sa iban nga linggwahi.
4. Para sa katigoriya nga Binalaybay, ang tima hilway. Ang pasakup kinahanglan indi magkubus sa kinsi (15) kag indi magsobra sa baynti (20) ka mga binalaybay. Ang kada binalaybay kinahanglan indi magkubus sa kinsi (15) ka mga linya.
5. Para sa katigoriya nga Sugidanun Pangbata, ang tima hilway kag nagakaangay sa mga bata nga nagaidad pito asta dosi (7-12) anyos. Ang pasakup kinahanglan indi magkubus sa pulo (10) kag indi magsobra sa kinsi (15) ka panid nga nasulat pinaagi sa kompyuter, dosi (12) ang kabahulun ka litra nga Times New Roman, dobli ang lat-ang, nabalhag sa papil nga nagasukol ka 8.5x11 purgada kag may sangka purgada ang distansya sa kada binit.
6. Para sa katigoriya nga Mamugu nga Sugidanun, ang tima hilway. Ang pasakup kinahanglan indi magkubus sa kinsi (15) kag indi magsobra sa baynti (20) ka panid nga nasulat pinaagi sa kompyuter, dosi (12) ang kabahulun ka litra nga Times New Roman, dobli ang lat-ang, nabalhag sa papil nga nagasukol ka 8.5x11 purgada kag may sangka purgada ang distansya sa kada binit.
7. Ang kada tagsulat makasumiti ka isara (1) lamang nga pasakup sa kada katigoriya.
8. Indi pagbatunon ang pasakup nga may ngaran, ayo, alyas, ukon paratandaan nga nagapakilala sa tagsulat.
9. Kon minor sa idad ang tagpasakup, ang Opisyal nga Pormas ka Pagpasakup kinahanglan pirmado ka ginikanan ukon ligal nga manogbantay ka tagsulat. Ang pormas libri kag sarang mabuul sa www.dungugkinaray-a.com.
10. Ang pasakup kinahanglan ipadara bilang Word file kag ipadara imaw ang nahuman kag pirmado nga Opisyal nga Pormas ka Pagpasakup.
11. Ipadara ang pasakup sa email admin@dungugkinaray-a.com halin sa Siptyimbri 1, 2016 asta sa tungang-gabii kang Siptyimbri 30, 2016 (Pilipinas nga oras). Magabaton ka sabat nga email ang tagsulat bilang pagpamaan nga nabaton ang ana pasakup.
12. Ang pasakup kinahanglan magtuman ka mga kasuguan kag layi ka gobyirno nahanungud sa nabalhag nga mga butang (printed matters), imaw run ang Republic Act No. 8293 ukon Kodigo sa Pagpanag-iya ka Kinaaram (Intellectual Property Code). Sa pagsumiti ka pasakup, ang tagsulat nagapamatuod nga tana ang nagsulat kag nagapanag-iya ka ana pasakup. Kon sa urihi masapwan nga nagbutig ang tagsulat, bawiun ang padya kon nagdaug, kag pabaydun ka mga damyos kag iban pa nga mga ginastos.
13. Ang tagsulat, magadaug man ukon indi, nagasaylo ka ana pagpanag-iya kag kinamatarung sa ana pasakup sa Dungug Kinaray-a Inc. nga wara ti kinahanglan nga bayad. Dya nga pasakup mangin propyidad ka Dungug Kinaray-a Inc., kag sarang gamitun sa nanarisari nga mga paagi, buruhatun, kag katuyuan.
14. Ang Dungug Kinaray-a Inc. lamang ang may kinamatarung sa pagpili ka mga katapo ka Hubon ka Manoghusgar. Ang Hubon ka Manoghusgar may kinamatarung nga indi magtugro ka padya kon, suno sa anda paghukum, wara ti pasakup nga angay padag-un. Kon may magpatas, ang Puno nga Manoghusgar ang mapili ka magadaug halin sa mga nagpatas. Ang disisyon ka Hubon ka Manoghusgar sarado kag indi sarang maislan.
15. Ang tatlo ka pasakup nga makadawat ka pinakataas nga puntos sa kada katigoriya, magabaton ka masunod nga mga padya: P10,000 kag midalya (una nga padya), P7,000 kag midalya (ikarwa nga padya), P5,000 kag midalya (ikatlo nga padya). Ang kada tagpasakup magadawat ka Sirtipiko ka Pagpasakup.
16. Ang mga madaug kag mga manoghusgar pagabantala sa Nobyimbri 15, 2016 sa www.dungugkinaray-a.com.
17. Ang kada tagpasakup nagasugot nga magatuman sa Giya kag Pagsurundan ka dya nga paindis-indis.
18. Ang mga tagdumara ka Dungug Kinaray-a Inc. ang may kinamatarung nga magdisisyon sa mga bagay nga wara rugya nasambit.
- Katapusan ka Giya kag Pagsurundan -
* Kon may pamangkot, palihog mag-email sa admin@dungugkinaray-a.com. I-klik ang butonis sa idalum para sa kopya kang Giya kag Pagsurundan kag Opisyal nga Pormas ka Pagpasakup.
