DK Nagbalhag ka Libro ka mga Kirab nga Istorya
Bugal nga ginatanyag ka Dungug Kinaray-a Inc. (DK) ang bag-ong balhag nga libro "Kirab: Mga Istorya sa Kinaray-a sa Kinyintos ka mga Tinaga." Antolohiya dya ka mga kirab nga istorya sa Kinaray-a nga nabalhag sa wibsayt ka DK angut sa “Pista ka mga Bugu nga Istorya” para sa tuig 2014.
Ang kirab sangka sari ka pagsulat nga angay sa ginatawag nga flash fiction sa Ingles ukon dagling kuwento sa Filipino. Kon sa atun pa, kirab nga istorya tungud daw kirab lang dya kang kalayo nga dasig madura kag, kon ipaanggid sa barasahun, dasig matapos.
Sangka maragtasun nga hitabo ang pagkahuman ka dya nga libro para sa literatura Kinaray-a tungud pinakauna dya nga koliksyon ka mga kirab nga istorya sa Kinaray-a nga nabalhag.
Ang antolohiya ginapasakupan ka mga orihinal nga istorya nanday Maria Milagros C. Geremia-Lachica, Emmy L. Masola, Linda C. Arnaez-Lee, Ritchie D. Pagunsan kag Danny S. Tabuyan. Naimaw man sa libro ang Filipino nga birsyon ka mga istorya nga ginbadbad nanday Emmy L. Masola kag Noel G. Galon, kag ginbuligan kay-ad ni Ligaya B. Bundac. Ang dibuho sa tabon ka libro ginhimo ni Mary Rose Adelle Pacificar para sa Dungug Kinaray-a Inc.
Kadamulun ka libro: 210 ka panid
Tagbalhag: Innobril LLC
Ginbalhag sa: New York, New York, USA
Ang mga libro igalunsad sa Disyimbri 22, 2014 sa San Jose, Antique imaw sa pagsaulog ka Pagdayaw 2014.
Sa mga may luyag magbuul ka kopya, makipag-angut sa DK paagi sa admin@dungugkinaray-a.com. Ang libro sarang man mabakal sa Amazon.com.