Ang Sugidanun ka Sadok
Ginsulat ni: Linda C. Arnaez-Lee
Kadamulun ka libro: 130 ka panid
Disinyo kag dibuho sa tabon ka libro: Marienell C. Venegas
Ginbalhag sa: New York, USA
Ang "Ang Sugidanun ka Sadok" ang ikarwa nga libro ni Linda C. Arnaez-Lee, nga isara sa mga katapo ka Hubon ka mga Tagdumara (Board of Trustees) ka Dungug Kinaray-a Inc.
Halin sa pamuno ka libro:
Pariho ka pagtahi ka mga sugidanun, ang pagrara ka sadok nagakinahanglan man ka mga matiryalis kag pamaagi nga nagasirinanto para dya mahuman nga manami kag mapuslanun. Nagakinahanglan man dya ka tyimpo, katutum, kauti, kabudlay, kag kinaadman, antis dya matapos kag makabig nga kalo.
Bilang kalo, ang sadok nagatugro kang katawhayan, pag-amlig, kag protiksyon sa nagasuksok. Sarang ko man makabig ang sadok nga sangka surudlan ka akun mga inagihan kag handumanan nga amo ang nangin balayan ka akun mga sugidanun.
Mga panugdaun parti sa libro:
Ang mga sugidanun ni Linda Arnaez-Lee wara nagakinahanglan kang maduro kag matayog nga mga tinaga agud mapabutyag ang kadalum kang sangka baratyagun. Sa pirang-nahut nga harambalun, mabuksan na ang gawang kang kalibutan, nga angay kang damgo, ang tanan puraw, sanaaw, kag maduagun, kag ang panahon tulad kag ang nagligad wara ti kinaiba kondi sangka tion lamang. Nagapakita dya kang pagkasampatun ni Arnaez-Lee bilang manunulat. Dya nga libro dugang nga bugal sa panulatan kang Kinaray-a.
Ritchie D. Pagunsan
Presidente, Dungug Kinaray-a Inc.
Tagdaug, Carlos Palanca Memorial Awards for Literature kag
National Commission for Culture and the Arts' Writer's Prize
Ang pagkamanunulat ni Linda Arnaez-Lee wara ginsun-ad sa akademya kag wara ginpabukalan sa mga writers workshop kondi halin gid sa anang pagkabuhi kag tumanduk nga paghangup ka Kinaray-a nga pagsinarayo. Karadlawan, karadlukan ukon subu, mga inagihan na sa ginbahulan nga lupa kag sa iban nga pungsod, sampat ang mga langkay sa sinulatan ni Arnaez-Lee. Ang dyang anang tinipon nga mga istorya dugang na nga halad sa bugana nga lamisa ka panulatan sa Kinaray-a. Atun gid dya!
Maria Milagros C. Geremia-Lachica
Manunulat kag mamalaybay
Isara sa mga harigi kang literatura Kinaray-a
Diin pwidi makabakal:
Ang “Ang Sugidanun ka Sadok” sarang run mabakal sa Amazon.com kag mabakal man sa CAP Building, San Jose, Antique sa Disyimbri 21, 2016 imaw sa paglunsad ka iba pa nga mga libro ka DK. Prisyo sa paglunsad: P500.