Ang mga Istorya ni Amo kag ni Bao:
Ang Pagtunga ka Sampono nga Saging
Ginsolat ni: Maria Milagros C. Geremia-Lachica
Kadamulun ka libro: 38 ka panid (coloring book)
Mga diboho sa tabon kag sulud ka libro: Gil S. Montinola
Ginbalhag sa: New York, USA
Halin sa pamono ka libro:
Ang tomanduk nga mga istorya isara sa atun mga ginpanobli halin sa atun mga mal-am. Kon atun isipun, sobra sangka gatos ka anyos run ang naglipas halin sa Amo kag Bao nga ginpagwa ni Jose Rizal. Haros tanan kita nga nagbahul sa atun isla okon banwa nakabati ka istorya ni Amo kag ni Bao. Ang dya nga akun ginsolat ginbalay ko man sono sa akun madumduman sa mga pag-istorya ka akun tatay kauna. Kon liw-as dya sa inyo nabatian, ria tungud ginlaktan ko man ka akun birsyon. Amo dya ang masadya sa tomanduk nga mga istorya tungud sa paglipas ka panahon, kadoro nga mga talinga ang namati kag kadoro nga mga baba man ang nagsogid. Tungud kamaan run kita magsolat, ang hambal ka atun mga mal-am sarang natun balikbalikan kag makaptan paagi sa libro.
Andut coloring book? Agud mangin bohi pa gid ang istorya, indi lamang sa panghunahuna ka mga bata kondi sa andang panuruk paagi sa pagkolor. Piro bukut para lang sa kabataan ang dya nga coloring book. Ginahandum ko nga kabay magtogro ka oras ang mga ginikanan sa pag-imaw sa anda mga kabataan sa pagbaloskay, pagbasa, kag bisan sa pagkolor. Ang pagbasa kag pagkolor ka dya nga libro nagapatimaan nga bohi ang tomanduk nga mga istorya kag padayon natun nga ginaamligan ang atun ginpanobli halin sa atun mga mal-am.
Togda parti sa libro:
Padayon nga bohi ang tomanduk nga mga istorya tungud may ikasarang dya sa pagsabat sa kinahanglanun kang panahon. Darayawun ang bag-o nga birsyon ni Maria Milagros C. G.eremia-Lachica nga may kagaranyat nga mga paglaragway ni Gil S. Montinola, sono sa madumduman na nga istorya ka ana tatay, tungud halad kanatun ka Kinaray-a nga birsyon ang ginapatihan nga sangka tomanduk nga Tagalog nga istorya. Ginsolat dya sa hambal nga duna sa rihiyon kag may kontribosyon sa nagarabong nga lihuk sa liwat-pagsogid ka mga istorya. Bukun lang ti mga folklorista ang dapat maghogyaw sa libro nga dya kondi ang mga bata nga makabaton ka mayad nga liksyon nga ipasolabi ang pagkasinsiro kag pagkaabtik it paminsarun. )
Eugene Y. Evasco
Propesor ng Malikhaing Pagsulat at Panitikang Pambata
Unibersidad ng Pilipinas Diliman
Diin pwidi makabakal:
Ang "Ang mga Istorya ni Amo kag ni Bao: Ang Pagtunga ka Sampono nga Saging" sarang run mabakal sa Amazon.com kag mabakal man sa CAP Building, San Jose, Antique sa Disyembre 21, 2016 imaw sa paglunsad ka iba pa nga mga libro ka DK. Prisyo sa paglunsad: P300.
Ang "Ang mga Istorya ni Amo kag ni Bao: Ang Pagtunga ka Sampono nga Saging" sarang run mabakal sa Amazon.com kag mabakal man sa CAP Building, San Jose, Antique sa Disyembre 21, 2016 imaw sa paglunsad ka iba pa nga mga libro ka DK. Prisyo sa paglunsad: P300.