Yanggaw
Ginsulat ni: Ritchie D. Pagunsan
Kadamulun ka libro: 184 ka panid
Dibuho sa tabon ka libro: Mythja/Shutterstock.com
Ginbalhag sa: New York, USA
Ang "Yanggaw" ang pinakauna nga libro ni Ritchie D. Pagunsan, nga isara sa mga katapo ka Hubon ka mga Tagdumara (Board of Trustees) ka Dungug Kinaray-a Inc. Amo man dya ang pinakauna nga koliksyon ka mga kaharadlukan nga sugidanun sa Kinaray-a.
Halin sa pamuno ka libro:
Andut ginpili ko ang tig-ulo nga “Yanggaw,” nga sa kultura Karay-a, sangka matunog nga lupok para sa mga nakahangup? Ginpili dya bangud gusto ko ipakita nga ang mga bukun Karay-a, sarang mayanggaw sa pagkatahum, pagkadalum, kag pagkamatinugahun ka atun ginapatihan, ginapanindugan, kag ginaudyakan kon mag-abot ang sirum kag mag-umpisa run ka tiriripon ang mga kabataan para mamati sa mga istorya ka anda mga kamal-aman.
Ang paghuman ka sugidanun, angay tuod sa tinig-ang, hay maduro ang mga rikobikos antis ang sangka uyas mangin bugas nga sarang tig-angun kag kan-un, nga ang karabo nagasarig sa sampat nga sahi ka bugas, sa husto nga panubig, kag sa nagakaigo nga paarang. Piro ang mayad nga manogbasa, may padugi man – mahanggup, mapitik ka asin, maburibod kang kalamay, ukon madapli ka imahinasyon – agud mas mangin saboroso ang pagbukod ka mga sugidanun.
Mga panugdaun parti sa libro:
Andut nagakawili kita sa mga sugidanun nga nagapabatyag kanatun ka makaparanindug-balahibo nga kahadluk ukon kakulba? Ang hadluk bala tumanduk ka atun pagsinarayo? Ayhan masabat gid dya ni Ritchie D. Pagunsan, ang Stephen King ka mga sugidanun nga kaharadlukan sa Kinaray-a. Ang "Yanggaw" nagapanghangkat sa panghunahuna kag nagasunlog sa mga ginapatihan ka manogbasa. Ang mga hitabo sa "Yanggaw" kag ang makaharawat-hawat nga panaysayun ni Pagunsan, nagapakita ka ana pagkalantip nga manunulat sa Kinaray-a. Lagtum-dulum, siri kag puraw nga kaharadlukan ang "Yanggaw." Bukut katingalahan kon duro ang mayanggaw.
Maria Milagros C. Geremia-Lachica
Manunulat kag mamalaybay
Sangka bahul nga amot diya kang panulatan nga Kinaray-a nga sarang idasun sa tradisyon nga gin-umpisahan ni Russel O. Tordesillas. Ang koleksiyon ni Ritchie D. Pagunsan wara lang nagapaligbus kang bulbol, nagapatubo kang kahadluk, kundi nagausisa sa madulum kag supernatural nga kamalayan kang Karay-a. Romantiko diya tungud naghalin sa sangka Karay-a nga nagapuyo sa New York; tumalagsahun tungud ginpili ni Pagunsan ang gothic genre agud padayunon ang anang koneksiyon sa lupa, pagsinarayo, kag dila nga namat-an. Idapun ta diya sa literatura kang kalibutan humalin kay Seneca, Edgar Allan Poe, kag Stephen King.
Alex C. Delos Santos
Manunulat kag mamalaybay
Diin pwidi makabakal:
Ang “Yanggaw” sarang run mabakal sa Amazon.com kag mabakal man sa CAP Building, San Jose, Antique sa Disyimbri 21, 2015 imaw sa paglunsad ka iba pa nga mga libro ka DK. Prisyo sa paglunsad: P500.