Antikenyo sa New York Tagdaug ka 2015 NCCA Writers’ Prize
ni Stephen Louie R. Checa
San Jose, Antique – Sangka Antikenyo nga nabasi sa New York, USA ang ginpili ka mga hurado bilang tagdaug ka National Commission for Culture and the Arts (NCCA) Writers’ Prize for the Drama Category in Kinaray-a Language para sa tuig 2015.
Ang dula ni Ritchie D. Pagunsan nga “Morado ang Duag kang Kalipay” ang nangibabaw sa tanan nga mga sinulatan nga ginpasakup kang mga kilala kag dumaan nga manunulat sa Kinaray-a sa pungsod.
Suno kay Pagunsan, ginahalad na ang ana kadarag-an sa tanan nga mga manunulat kag nagapalangga sa Kinaray-a, ilabi run gid sa ana mga kasimanwa sa probinsiya ka Antique.
Ginpahayag man ni Pagunsan ang ana kalipay bangud nga ang panghambal nga Kinaray-a ginaabay run sa mga kilala nga pungsudnon nga paindis-indis parihas ka NCCA Writers’ Prize.
Ang NCCA Writers’ Prize ginapatigayon kada darwa ka tuig kag ginatugro sa lima ka mga manunulat sa lima man ka katigorya. Sa kadya nga tuig, ang padya igatugro sa masunod nga mga katigorya: Poetry (Kankana-ey language), Novel (Rinconada language), Essay (Meranao language), Short Story (Kapampangan language), kag Drama (Kinaray-a language).
Ang padya nga mabaton kang tagsa ka tagdaug nagalagting nga dos syintos singkwinta mil pisos (P250,000.00).
Suno kay NCCA Division Chief G. Bernan Corpuz, ang seremonya kang pagpasidungug sa mga tagdaug pagahiwatun sa Agosto 15, 2016, alas singko it hapon sa Barbara's Restaurant, Intramuros, Manila.
Sa tulad, si Pagunsan ang Presidente ka Dungug Kinaray-a Inc., sangka grupo ka mga manunulat sa Kinaray-a sa bilog nga kalibutan nga nagatib-ong kang Kinaray-a paagi sa pagtipon, pagtingub, kag pagtipig kang Kinaray-a nga literatura, kultura kag arte.