Si Tyo Puntoy
ni Ernesto L. Lasafin
“Birik! Birik!” pugait ka maramal-am nga bayi sa ingud ni Tyo Puntoy. Sa hinali nga pagpuut turung ka ruyda ka malabug nga dyip, pagtayud it gulpi ka bayi, kayutan lang tana nagpasabak sa nahangyus man nga si Tyo Puntoy nga nakapisuk.
“Nagtalang man takun ka paranaugan ko. Malaka pa abi sa tigkaramoti makapasyudad mong,” muno ni Tyo Puntoy. Ya mal-am nga bayi nanaog dayon sa dyip.
“Wara kaw ma’t dara nga mabug-at, Tay?” mana ka kundoktor.
“Isara ka rayna nga pilit kag daw darwa ka kurha nga kadyus,” sambit ka mal-am. “Mamag-an man daya, a.”
“Mapagrus pa man timo magtukad sa banglid ka Bingawan, Tay?” paaman ka kundoktor.
“Sitinta’y nwibi pa lang ako, a. Nakaduan pa gani kon gab-i ya isposa ko kanakun.” Retirado nga soldado si Tyo Puntoy.
“Insa pwidi pa timo, Tay, haw?” amot ka nagayumoyumo nga konduktor.
“Basta kaisa lang. Knight dya tana mong, pay once a night is now enough.” Nagtinalangkaw dayon ya pira ka mga tigul-it nga laki sa sulud ka dyip nga halin sa Bingawan nga nagabyahi pa-Iloilo City.
Mga kalim-an mitro ma lang ya ginwantowanto ni Tyo Puntoy paagto sa balay ka bugtong na nga bata nga nakapamana it taga-banwa ka Pavia, Iloilo. Ya umagad na nagaobra man imaw ka asawa saIloilo Provincial Capitol. Sa sangka apartment sanda nagaistar sa Calubihan sa Jaro, Syudad ka Iloilo.
Hay Sabado, wara it klasi gani ya tatlo na ka apo nga isara bayi kag darwa laki nga mga istudyanti sa hayskul ya nagsugata sa andang lolo.
“May kalamay-hati kag ibus nga ginpadara si Lola Opro ninyo kaninyo,” hambal ni Tyo Puntoy sa pagbisa ka andang tatlo ka apo. Nagpahuway nga maistra sa Grade I tay Tya Opro.
“Lolo Puntoy, insa wara tay Lola Opro nag-imaw kanimo?” pamangkot ka manogdaragita dun nga gwapa nga tinedyer.
“May pangginggi tanda imaw ka anang mga amiga tuya sa namatyan nga ingud namun. Sa dasun lang kuno tana mabisita duon kaninyo.”
Gin-udakan dayun ka tatlo ka apo ya dara ka andang lolo nga karan-unun.
Darwa ka El Niňo ya nagpabalingasu ka mga kabanglidan kag kapatagan kag ginsubwan man ka pito ka bagyo nga may ikog nga pagpanglambas ya nagbuhin ka pira ka ginagutum nga mga inanak ni Eba. Isa si Tyo Puntoy nga nabiktima ka kapintas ka tyimpo.
Inataki sa korason tay Tyo Puntoy nga inisa lang kag naggudbay tana sa patulos nga aranyun na pa daad.
Sa pagguru kay Tyo Puntoy sa nitso sa patyo man ka banwa nanda, nagyuruhum man ya mga nag-akumpanyar kag Tyo Puntoy hay nagpanarambitun man tay Tya Opro. Pay daw wara man gid masub-i ya balo dun nga mal-am.
“Ti, Puntoy, gudbay lang kanimo hay uyon mo man nga indi ko ikaw paghibian. Hambal mo ikaw dukaron kag ako duman harum-an. Ano pa wara timo nagainum bulong sa hayblad kundi beer man ya imo uyon. Kag ihan ayawan ako ka dya ka pangginggi hay dobli dun akun inogpatad hay panubliun ko ya pinsyon mo.”
- Katapusan -