Ang Langgaw kag Kalamay
ni Consolita V. Rubino
Nakapalipay kaw bala sa iba nga tawo, bisan sa sangka mal-am lang? Sa akun dalanun kang pagpangabuhi, naagyan ko ang obra nga pag-atipan sa mga kamal-aman. Sa sangka ahinsya, rugyan ko tana una nga nakilala kag nakaimaw sa sulud kang darwa lang ka oras. Mal-am tana nga nagaidad otsinta anyos.
Rugyan tana nagapungko sa kilid kang anang katri nga masinurub-un nga nagalantaw sa gwa kang anang bintana. Bisan manami ang ralantawun sa gwa, indi dya makita sa anang uyahun. Malinung lang tana nga nagapungko. Ginparapitan ko tana kag nagpungko ako sa tupad na. Nakita ko nga may luha nga nagsungaw sa anang mga mata.
“Ginapung-aw ako,” ang hambal na kanakun nga tuman ka bug-at ang baratyagun nga nagahibi. ”Wara ako ti nanay, wara ti tatay, kag ang akun mga bugto rugto sanda tanan sa marayu. Wara man ako ti pamilya. Tama gid ka subu ang akun ginabatyag.” Ginpahid kang kurinut na nga mga palad ang nag-agay na nga mga luha.
“Ahay, masinurub-un gid gali ikaw,” ang sabat ko kana nga tuyo magmag-an ang anang buut. “Kon ikaw masinurub-un, sa atun pa, ikaw ang aslum nga langgaw.” Nagturuk ang mal-am kanakun kag dayon nag-untat sa paghibi. Nagyuhum ako kana. “Ako takun malipayun, sa atun pa, ako ang kalamay. Gusto mo nga isimpunon natun ang langgaw mo kag ang kalamay ko para makahimo kita kang rilasyon nga ginatawag nga atsara ukon “pickle relationship” sa Ingglis? Ang kinahanglan lang natun, bagnas nga kapayas. ”
Daw nagsanag ang ana mga mata kag nagturuk kanakun.
“Ang bagnas nga kapayas pariho kang pangabuhi natun rugya sa Balay Darangpan sa diin, nagadipindi kanatun kon paano natun panamitun kag ikan-un,” padayon ko samtang mahugud tana nga nagapamati kanakun. “Pwidi nga isawsaw lang natun sa langgaw – manamit dya piro tama ka aslum. Pwidi man natun inunu sa kalamay – piro daw balangag ang sabor. Para manamit sa panabor ang bagnas nga kapayas, atun dya nga kagudon ka manipis, liswahan ka ininit kag timplahan ka ginsamo nga langgaw kag kalamay. Amo pa lang kag masagamsaman natun ang kanamit ka bagnas nga kapayas.”
Nagyuhum ang mal-am, nagkadlaw, kag nahimo dya nga harakhak. Nalingaw gid tana sa akun istorya parti sa atsara. Wara magbuhay, nalipatan na ang anang kasubu, nagnami ang anang pamatyag nga nakakadlaw, kag nabuhi ang ana ispiritu dara ka akun pagpahangup nga bilang langgaw kag kalamay, kinahanglan namun mag-imaw para matugruan ka manami nga duag ang amun kabuhi sa Balay Darangpan .
“Mayad nga aga, Kalamay!” Otis ka mal-am kanakun kada aga nga buta ka yuhum ang itsura.
Kon kis-a kinahanglan natun ang langgaw kag kalamay sa atun kabuhi. Kinahanglan natun nga mag-atipan ukon atipanun, maibang tawo man ukon myimbro ka atun nga pamilya. Ang mayad nga pinanggas, nagapatubas kang mayad nga bunga nga amo ang kalipay sa atun tagipusuon.
Matuod gid man nga ang langgaw nagakinahanglan kang kalamay nga katimpla sa rilasyon para magbakud ang baratyagun. Bisan sa gamay lang nga higayon kon makakadlaw kita, ang kapung-aw sarang nga matunaw.
- Katapusan -