Iroplano nga Papil
ni Salvacion S. Maldecir
Nagagirinual sa sulud kang kwarto ka amun iskwilahan. Una nga mga inadlaw ka Iniro kag bag-o lang nagbukas liwan ang klasi. Daw sa kaangay lang ka nagabuskag nga rosas ang manayanaya namun nga uyahun hay nagayapayapa gid kami nga magkiritaay ka amun mga klasmit kag abyan.
Ilabi run gid si Boyet, ang paraligoy namun nga klasmit nga gulpi naganyat mag-iskwila umpisa kang may bag-o kami nga klasmit kag akun amiga nga si Lorena. Nag-amigahay kami ni Lorena bangud rapitay ang amun balay kag pirmi kami nagadungan mag-agto sa iskwilahan.
Nagakanangkanang gid ang mga mata ni Boyet pagkakita na ka mala-dyosa nga yuhum ni Lorena. Kon paminsarun lang, daw sa masilaw man ang daraga sa nagadulot kag malawid nga turuk ni Boyet. Isug lang dya si Boyet sa turuk, ugaring apa. Pirmi lang nalumus sa anang pagkamarayhaun. Ano pa, bisan daw malukso run kalimutaw na ka turuk kay Lorena, wara gihapon ti hinaputan.
"Mabuganaun nga bag-ong tuig kaninyo nga tanan!" panamyaw kang bag-ong abot namun nga maistra.
"Kanimo man, Mam!" dururungan namun nga sabat.
"Kamusta ang inyo bakasyon? Wara kamo maayawan ka panglugayawan?” pamangkot ni Mam nga wara man naghulat ka sabat. “Sa rum-an may importanti ako nga aragtunan gani bilinan ko lang kamo ka orobrahun. Kopyaha nyo ang akun nga pagasulatun sa blakbord para amo dya sa rum-an ang obrahun nyo.”
Bisan nagaturuk ako sa amun maistra, indi gid malikawan nga matalupangdan ko si Boyet nga saku sa pagbilid ka papil. Ginaburubaliswa na ang papil dayon hana nga masulat piro wara nagakadayon tapos mag-ulung-ulung ka anang ulo. Brubhay nagyuhum kag dayon na sulat tapos ginpiudpiud ang papil kag ginpalupad paagto kay Lorena. Iroplano gali nga papil ginhimo na, nga sa kadimalasun ginhuyup ka hangin paagto sa amun maistra. Dawa gindakup ni Mam ang iroplano nga papil, ginbilad kag ginbasa sa bilog nga klasi.
"Palangga ko gid ikaw!"
“Sin-o kaninyo ang nangisug nga maghimo kadya?” pamangkot ni Mam nga nagahurungag ang irong sa kaugut. “Kon sin-o kaw man nga matandus kag maaram nga wara mo ginbutang ang imo ngaran, andam kaw lang kon maman-an ko. May ginapaobra kaninyo, mga anoano tana inyo ginakuti dyan," malawid nga litanya ka amun maistra.
Ginturuk si Boyet ka mga klasmit namun nga nagapungko sa likod na kag wara ti patay man nga sikul kana ka anang ingud nga daw nagapangyaguta.
Likum sa tanan, si Boyet gali daw ginasalapid run ang tinai sa kakulba kag kahuya. Kon haros pa lang, daw manago dya sa anang bayo kag manginduraan. Amo nga bisan kaina lang daw nagabutlak nga adlaw ang anang itsura, gulpi dya nga daw tinakluban kang kadulum. Dalidali dya nga naggwa. Mayad lang gani hay wara run nang-usisa liwat ang amun maistra kag iba nga mga klasmit.
Umpisa kato, nagligoy ruman si Boyet. Kag kon sa sulud ka iskwilahan, wara run nagpamugno bisan kay sin-o. Pirmi dya nagasaranhun kag nagakuub. Wara gid nakabawi si Boyet sa kahuya nga ana nabatyagan. Hasta nga naghamtung, wara run nakapangasawa si Boyet.
- Katapusan -