Disisyon
ni Linda C. Arnaez-Lee
Kaina pa tana nagapungko rugya sa Twosome Place, sangka kapihan sa atubang kang subway sa Koejong. Makita na sa salaming nga dingding ang mga tawo nga nagaaragi sa gwa. Mag-alas dose run sa udto-adlaw, piro wara gihapon tana makadisisyon kang ana himuon.
Kabii pa ang bais kang anang dughan kag utok. Hasta kadya wara gihapon mahisaydi kon makipagkita tana kay Kris ukon indi.
Katsat na si Kris, sangka Amerikano nga nagatudlo rugya sa Korea. Nakilala na dya sa sangka wibsayt kang nagapangita tana kang obra bilang manogtudlo sa Ingles. Nabasa na ang minsahi ni Kris nga gusto magtuon kang Tagalog para sa ikarwa na nga pagbakasyon sa Pilipinas.
Nagbalus tana kag gintao ang ngaran kang sangka grupo nga nagatudlo kang Tagalog. Nagpasalamat si Kris kana. Amo to ang umpisa kang anda pagtsat kag pagkilalahay. Nagmuno kabii si Kris nga gusto na magkitaay sanda kadya nga adlaw.
“Para ano? Para mahanas ang anang Ingles. Kinahanglan na sa anang pangabuhian. Baribad. Natun, nakunyag ria nga makita si Kris sa personal. Pulo ka tuig antad kang andang idad. Daw hinablos na lang. Ti, ano labut ka idad sa pag-abyanay? Pakig-abyan lang ayhan ang gusto? Indi kaw magbutig. Ginalandi kaw ni Kris sa tsat, nagpasugot kaw man!” Amo dya ang baisanay kang magagmay nga mga limug sa utok ni Luisa.
Ginhigup na ang nagramig run nga kape. Pait! Sa pagkapait kang anang ginabatyag.
Dawa na magtindug kag maggwa sa kapihan. Wara tana sa kaugalingun nga naglaktud sa karsada paagto sa sangka shopping mall sa atubang. Makatiringil nga busina ang nagpamadmad kana. Namarasmasan na nga rugya tana sa tunga kang karsada kag pula ang sulo kang tropiko. Ginsinggitan tana kang mga drayber. Ginadalagan na ang nabilin nga pihak ka karsada. Nagkurunus ang anang ginhawa.
“Naiwan ikaw, Luisa? Gusto mo magpakamatay?” wangal kang anang hunahuna.
Nagpungko tana sa bangko sa atubang kang mall. Nagpamuruypuy ang ana mga tuhod. Nagaparangramig ang bug-os na nga kalawasan. Sigi ang kuba-kuba kang anang dughan. Nagahirapit run ang oras kang andang pagkitaay. Ano ang himuon na?
Nagragingring ang silpon na. Si Changmin, ang anang bana ang nagapanawag.
“Yoboseyo?” ang sabat na nga natingala. Indi ugali ni Changmin ang manawag sa udto-adlaw.
“Luisa! Sa diin kaw? Nanawag maistra ni Jun-jun. Ginapauli na kuno hay taas ang hilanat. Ulii anay to,” ang hambal ni Changmin sa pihak nga linya nga sa daw nagadali. Mabatian ang mga pogpog kag sirit kang mga wilding sa paktorya nga ginaobrahan ni Changmin.
“Sigi,” ang sabat ni Luisa nga nakurdam. Dalidali dya nga nagtindug kag nagtawag ka taksi pauli.
Nagataramos ang luha na samtang nagasibin kay Jun-Jun nga ginakalayo sa hilanat. Kinahanglan pa bala nga magmasakit ang ana bata para makabugtaw tana sa ana kaumangan?
Pagkagabii, nangayo tana kang pasaylo kay Kris. Ginpamaan na nga amo run to ang katapusan nga minsahi halin kana. Ginpara na dya sa listahan kang ana mga abyan.
Nakaginhawa kang masulhay si Luisa. Nagluhod sa pagpasalamat nga wara tana ginpabay-an sa tinion kang mga pagtiraw.
- Katapusan -
*Litrato: Himo ni Stella Im Hultberg halin sa http://ego-alterego.com/2011/04/absolutely-gorgeous-woman-painted-stella-im-hultberg/malibu_stella_waitingindreams/#.U7l-3PldWTJ.