Ang Usa kag ang Tibo-tibo
ni Emmy L. Masola
"Kataraka! Kaina pa akun turog," kimod ni Usa. "Mainum ta bala ka tubig."
Nagparapit si Usa sa suba. Kang hana mag-inom, natuslok anang hingod-hingod kang buli ni Tibo-tibo.
"Tampuhaw! Gintuslok mo tana sungad ko haw?" panggasud ni Usa.
"Migo Usa, wara takun kamaan nga isawsaw mo timo baba mo sa suba kag idukduk ang sungad mo sa bato nga ginaduktan ko. Wara mo ako makita haw?" sabat ni Tibo-tibo.
"Buut mo hambalun, lamun ako hay wara ta ikaw makita?" pangmusa ni Usa, pero nalipay sa hitabo hay nakadumdum ka ideya nga makalingaw kana.
"Bukun amo ra ang buut ko hambalun, migo Usa."
"Wara ako ti labut. Kinahanglan mapamatud-an kon sin-o kanatun ang lamun paagi sa paunauna lab-ot sa baba ka suba," pangtaksar ni Usa.
Nabatian dya kang nagakirinapol nga mga tibo-tibo. Mangindi pa raad si Tibo-tibo pero nahaylo dya kang mga kaimaw na.
"Kon amo ra gusto mo, migo Usa, batunon ko ang imo panghangkat."
"Baw, isug gid ang malapituk nga dya," pinsar ni Usa. "Kon amo, umpisahan ta run!"
Kag nagbira-bira dalagan si Usa. Mga dyes kilometros ang karayuun kang baba kang suba. Kang nakadalagan ka sangka kilometro, gin-abot kang katuyo si Usa, gani nagpahuway dya sa idalum kang bugto't-tai.
"Sa kagamay ni Tibo-tibo, mga lima ka dupa pa lang siguro naigod-igod na," kuon ni Usa sa kaugalingun kag dayon na turog.
Makaligad ang sangka oras, natipungawan si Usa hay namuukan gid ka turog. Nadumduman na ang parumba nanda ni Tibo-tibo.
"Tibo-tibo, diin kaw run?" singgit na nga nagasala-sala.
"Dya ako, migo Usa," sabat ni Tibo-tibo nga mga lima ka dupa ang abanse kay Usa.
"Hay, salamat, gamay lang antad na," hani ni Usa sa kaugalingun, kag nagbira-bira liwan ka dalagan. Kang makadalagan sangka kilometro, namangkot ruman, "Tibo-tibo, diin kaw run?"
"Dya sa ingud mo, migo Usa."
"Baw, dasig ang malapasi nga dya," kurumudon ni Usa, kag ginbirahan pahuyab hasta nga mga tatlo ka kilometro ang nadalagan na. Nagpundo liwan kag namangkot, "Tibo-tibo, diin kaw run?"
Sa gihapon ang sabat, "Dya sa ingud mo, migo Usa."
"Asus! Kadasig ka malapituk nga dya. Daw mapukros run akun ginhawa ka dalagan, daw wara lang kana," nagaharangus si Usa, pero gindasig na pa gid ang pagdalagan.
Kang mga sangka kilometro run lang ang karapitun kang baba kang suba, namangkot ruman si Usa kay Tibo-tibo, pero amo gihapon ang sabat. Gindasig na pa gid ang pagdalagan bisan daw ginalagas na run ang anang pagginhawa sa kahapo.
Makaligad ang pira ka oras, natingala ang mga tibo-tibo kon andut wara run ti Usa nga nagapamangkot.
"Migo Usa!" singgit ka sangka tibo-tibo.
"Migo Usa!" singgit pa gid ka sara sa uruunahan.
Hasta ang tibo-tibo sa baba ka suba, naayawan ka hulat pero wara ti Usa nga nakita. Brubhay may nag-abot nga mensahe dara kang sangka tibo-tibo man.
"Mga amigo, wara't swerte gid si migo Usa. Nabugto ang hinurangus. Indi nyo run paghulata nga maabot dyan."
- Katapusan -
* Litrato: 2. Himo ni Corinne Aelbers halin sa https://www.etsy.com/shop/6catsart?ref=l2-shopheader-name.