Ang Sobra nga Panit
ni Linda C. Arnaez-Lee
Hinayhinay ang mga tikang, daw sa nagatiid kang umbok nga pispis si Mayang samtang nagapalipud sa puno kang marabong nga madri di kakaw nga nagasirbi kudal sa balay nanday Mayok. Aragyan paagto sa balay nanday Mayang ang inas sa tupad ka madri di kakaw. Halin tana sa awang kag bitbit ang darwa ka galon nga tubig kang mabatian na ang limug ni Mayok.
“Ano kuno to? Sobra nga panit?” pamangkot ni Mayang sa kaugalingun. Ginparapit na pa gid ang ana talinga sa puno ka madri di kakaw. Indi na mahangpan kon andut nagakubakuba gid ang dughan na pagkabati kang sobra nga panit. Intirisado gid tana maman-an kon ano pa ang sunod nga ihambal ni Mayok.
“Huud, Nay! Andut tana may sobra nga panit nga nagtubo sa akun lawas?”
“Ay, amo gid man ria, Yok, hay nagasinoltiro ikaw. Maagyan mo gid man ria,” sabat ni Tiyay Minda nga nagapanahup kang bugas sa sagwa kang andang kusina.
“Piro, Nay, ginasunlog run ako kang akun mga amigo sa iskwilahan. Ano mayad ka dya himuon man? Uhud, lantawa bala.”
Nagmara ang tilaok kag nagbuslo ang mga mata ni Mayang pagkabati kang hambal ni Mayok. Gusto na man makita ang sobra nga panit. Ginwahig na ang mga sanga kang madri di kakaw nga nagalipud sa anang atubang. Nakita na ang nagatalikod nga si Mayok nga daw hana magluslos kang anang puroy.
Susmarya! Kian lang nagtyabaw si Mayang sa nakita. Mayad lang hay natapnan na ang anang baba. Daw sa kikik nga gulpi gintakluban ang limug na. Nagbalikid si Mayok sa nahamtangan na. Sa sobra nga kahadluk madakpan, nagkarailwak ang tubig sa galon sa sobra nga dalagan ni Mayang pauli.
Pagkasunod nga adlaw, daw indi ka turuk si Mayang kay Mayok kang nag-abtanay sanda sa dalan paagto sa iskwilahan. May likum nga pagtamud si Mayang kay Mayok. Nanamian gid tana magturuk sa mata kag bibig ka soltirito. Daw sa nagapanghagad. Piro kon tana gani turukun ni Mayok daw matunaw sa kahuya. Sa idad nga dosi anyos, nagpitik run ang birik ni Mayang.
“Yang, may agtunan kaw kar-on pagkatapos buhi?” pamangkot ni Mayok kang nasat-uman na nga mahipus si Mayang kag daw sa hungud nga nagapaurihi. Nagduyu kang makadali si Mayok para hulatun si Mayang.
“Anhaw?” sabat ni Mayang kang magdungan run sanda panaw.
“Basi pwidi mo ako imawan kar-on rugto sa banglid? Gusto ko lang huksun ang sobra nga panit nga nagtubo sa akun ….“
“Ay! Indi ako pwidi, may sugo si Nanay!” dasig nga sabat ni Mayang.
Kag dayon na dalagan pasulud sa iskwilahan. Kinulbaan tana sa nabatian. Andut ginhagad pa tana ni Mayok? Nakita ayhan tana kahapon sa puno kang madri di kakaw?
Pagkabuhi, likum nga ginsunod ni Mayang si Mayok paagto sa banglid sa unahan kang andang balay. Nalipdan kang mga kugon si Mayok nga nagapungko sa nagaulbo nga gamot kang kasoy. Hinayhinay nga nagparapit si Mayang.
Wara gid katalupangud si Mayok hay sigi ang pauyut-uyut na ka tuhog ka bariri sa anang kalunggo.
- Katapusan -