Sangka Mainit nga Adlaw
ni Linda C. Aranez-Lee
Alas diyes pa lang sa aga piro mainit run ang Kalyi Rosario. Makita sa krusing, ang sangka tatlo ka panalgan nga bilding. Ang una nga panalgan ang karindirya kang mag-asawa nga si Marga kag Pakik, ang ikarwa amo ang anda ginaulian, kag ang ikatlo ginaistaran ni Angie nga sangka GRO sa Kabibi Bar.
Sigi ang panguyab samtang nagawalwal si Marga nga ginatudotudo si Pakik nga nagapamahaw sa lamisa. Kasanagun run abi nag-abot kag lingin pa. Ang hambal na matabo lang sa sangka bolanti kang ahos sa pihak nga banwa, piro naagahan sa pag-uli nga wara man ti dara bisan sangka kulod nga ahos.
“Rugto kaw liwan nagpahurum sa Kabibi Bar no? Man-an ko, bisan indi mo pag-akuon! Lain nga dapug kang ahos ang dara mo!” hambal ni Marga nga dasig ang panguyab kag nagapasambil kang bibig.
“Ano ginangasal mo?” sabat ni Pakik nga sigi ang supsup kang tibotibo. “Ay, Margarita! Aga pa timo nagpangasa! Wara kaabot ang manogbolanti kahapon, ugaring nagkitaay kami ni Pre Naldo. Ginhagad na ako sa balay na hay birtdi ni Iking nga ihado ko. Ay, panulay nga tibotibo dya, kaawut supsupun!” Dayon na tablug kang ginakaptan nga tibotibo sa yahong kag magtindug pagwa sa karindirya. “Mainit ang panahon, indi run pagdugangi!”.
“Hoy, Paquito! Wara pa ako katapos kanimo!” tyabaw ni Marga nga nagasunod kay Pakik.
Samtang sa gwa kang karindirya, nagagirinual ang mga tawo sa karsada.
“Sandiya! Bakal kamo sandiya! Matam-is nga daw may kalamay-pula. Bagay gid sa mainit nga panahon,” ang singgitan ni Roming sa tupad kang gamay nga trak nga buta ka sandiya. Burubhay, nagahangushangus nga nag-abot si Darya nga bitbit ang sangka biak nga sandiya.
“Hoy, Romeo! Hambal mo tam-is dyang sandiya mo? Sa pagkalas-ay kag, lantawa, lapsi pa dya sa itsura mo!” sukma ni Darya kag ginbalik ang sandiya kay Roming.
“Sigurado kaw nga kanakun mo ginbakal dya? Tam-is tana ang akun sandiya!” Ginbalik na ang sandiya kay Darya.
“Ay, ibalik lang ang kwarta ko! Imo lang ang sandiya mo!” Ginbalik liwan ni Darya ang sandiya kay Roming.
Sa sobra nga tudlanay, nahulog ang sandiya kag narupsak sa karsada. Amo man ang pag-agi ni Pakik nga nagadagun-dagun kag ginasunod ni Marga. Nalapakan na dya kag nakadanlug. Nagkayakaya gid si Pakik. Nagkirinadlaw ang mga tawo sa palibot. Ginbuyayaw ni Marga si Darya, hay bangud kana nakadanlug ang ana bana. Nagbalus man si Darya buyayaw hasta nagguramusay sanda nga darwa.
Sa atup, nagapanghalay si Angie kang linabhan kag nakita na ang tanan nga nagkaratabo sa idalum. Sa sobra nga isol ni Angie, nasikadan na ang sangka misitasan kag nahulog dya kag nagtupa sa ulo ni Roming. Nagtangra ang tanan sa ibabaw. Nakita nanda si Angie nga nakasuksok kang bistida nga puti kag kitaun ang pula nga panti. Nagnganga ang mga baba kag nagbuslo ang mga mata kang mga laki sa idalum nga nagalantaw.
Pagkakita kang mga asawa, nag-inuran ka inumol, tampa, sipa, kusbot, guramus, kag buyayaw.
Baw, sangka mainit gid nga adlaw sa Kalyi Rosario.
- Katapusan -