Matapos pamatian ang kanta nga “If I were a boy” ni Beyoncé
ni Stephen Louie R. Checa
sobrahan gid timo ba -
pamatyag mo ikaw lang ang mayad.
huod, man-an ko
nga ang gugma gakinahanglan
kang kaisug kag paghangup
agud diya magtubo ugaring naman-an mo man bala
nga ang baruto nga papel indi maglutaw sa dagat nga kalayo?
dayaun gid timo -
wara mo gid takun gintudluan mamati
sa imong mga baribad
nga andut matapos ko buksan
ang akun mga talinga, pinsar kag tagipusuon
sa imong mga pasarig
nga hasta tulad wara gid it may natuman.
hambal mo dalok ako.
pero ano run lang bay
ang sarang ko matugro kanimo
hay gin-ubos mo run.
mas dalok gid timo eh -
antes mo gani ipahaklu kanakun
ang imong kahamot
ginahulat mo pa
nga malumus anay ako
sa akun balhas kag luha.
huod ginaako ko
nga kahiridlaw kaw man
ugaring mas piliun ko
nga rayu ako kanimo
bangud sa luyo mo
mas kahiridlaw ang kahilwayan.
abaw, maluoy kaw sa lawas mo
indi run paghanduma nga isuksok
ang akun tsinelas
hay basi masuyak kaw lang
kang gintuga mo nga tunuk.
sugidan ta kaw…sakit!
ay, maan! ginabasol mo gid takun!
indi bala hambal ta bisan ano matabo
indi gid ta magbulagay
pero rugya gihapon takun
pro diin run ‘kaw?
ano abi hay
bisan kang imaway ta pa
may ginabalikid run timo nga iba.
ahay, mayha mayha man!