Ikaw ang dyip
nga pwirti ka itum ang aso
kag ako ang pasahiro ka motor
nga gasonod kanimo:
 
Lawid ko nga gin-agwanta
ang paghaklu ka hilo
nga imo ginaboga
kag ang pagtulun ka yab-ok
nga gapakutuy
ka akun soroksorok
masondan kaw lang
ka akun mga mata
kag tagiposoon
nga kanimo gahigogma.
 
Piro kadya,
indi ko run gid maagwantahan
ang makasoroka nga aragyan
sa diin pirit mo ako ginapatay
kag ginapatalang.
 
Indi run kitaun
ang dalanun
nga ginpromisa mo
kaona kanakun
nga imaw natun dab-oton.
 
Wara mo run ako ginabalikid
kag wara gid kaw nagaprino
kag kamostahun ako.
Wara mo man lang gani nakita
ang gadamilot ko nga loha
sa mata ko nga napoling mo
ka baras ka pagbiya.
 
Padayon nga galubug ang tanan
samtang ikaw akun ginasondan.
Indi ko run maman-an
Kon maabtan ko pa kaw sa onahan.
 
Gani, antis ako magtalang,
malipung kag magbaroron
imaw sa akun handum,
maliko run takun.

​Mala-bangkiling
Ang akun balhas
Bangud sa kagin-ut
Nga akun nabatyagan.
 
Ayhan basolon ko
ang ANTECO
bangud indi mag-andar
Ang amun electric fan
Okon ikaw,
nga kon makita ko,
daw ginagaang
ang akun pamatyagan
kag nagadasig ang pitik
ka akun tagiposoon?
 
Ah, man-an ta lang ra kar-on
Kon magbalik run ang koryinti.

 
Kaina lang
Sangka tindahan
Rugya sa San Jose
Ang ginkandadohan
ka mga taga BIR
Hay wara kono
Ti ginatogro nga risibo.
 
Abaw, palangga
Nadumduman ko dayon ikaw ─
 
Kag ang adlaw
Nga ginpagwa mo ako
Sa kabohi mo
Kag ginkandadohan mo man
Ang imong tagiposoon
Agud nga indi ko liwan pagsudlun
Bangud lang sa rason
Nga wara run ako
Ti may maitogro kanimo.

​Domaan 
nga baratyagun
para kanimo
ang akun 
balon
sa pagsogalaw 
ka bag-o 
nga toig:

Ang mga protas 
kag hamon
maobos, 
madonot,
mapan-us;
ang mga palopok
maarum, 
maomido;
ang tambuk 
sa akun lawas
matonaw, 
madora
piro indi 
ang balor mo
kag ang akun 
pagpalangga 
kanimo.

 
Ang Valentine’s Day
 sa kadya nga panahon
 duro it pungyahun:
 
Sa duro ka mga daraga;
kon bukun kotsi, kahamot kag kagwapo, pasinsiya.
 
Sa duro ka mga soltiro;
kon bukun pagwarus kag pagpalagyo, tsamba.
 
Sa mga balo kag laon;
kon bukun kasubu kag pagsarahanun, paglaum.
 
Sa mga gutum;
kon bukun kaima kag pagkasigput, grasya.
 
Sa mga nigosyanti;
kon bukun kumpitinsiya, kwarta.
 
Sa mga mag-asawa;
kon bukun pag-uyang ka tyimpo kag kwarta, kasadya.
 
Sa kanakun;
kon bukun ikaw, basura.
​

Ginsurprisa kita kang langit
sa gulpi nga pagkirinalas 
kang atun atup.

Nag-uran
gulpi lang ginlamon
ang ragumu 
kang atun mga kadlaw
piro wara kita nag-untat.
Ginkuum mo pa gani 
ang akun palad
kag dayon ginsundan 
kang hugut nga kupkup
kag mahagpok nga haruk.

Gintangra ta ang atup
salamat, wara run pagturo.
Mayad lang 
nahingagaw ta 
ka hanig 
antis dya mag-abot.

Naglingling ta sa bintana
naglapaw run 
ang tubig sa kalog
paagto sa atun ugsadan.
Mayad lang gid
nahingagaw ta ang latayan.

Man-an ta 
nga pagkatapos ka dya
mabulus
ang pagdamilot kang lao
Piro wara’t kaso
ang mga tarablug nga ulus 
kang atun mga nagligad.
himoon ta nga tararapo.

Abi guro kang langit
mapahug na kita, no?

Nasunog ang akun balay
sa diin rugto ang akun tagipusoon:
wara gid takun magdahumdahum
nga masunog ang akun sinin-ad
nga pagpalangga kag mga handum
nga kana ko man daad ipakaun.
Wara na gid ginlantawlantaw
hay bilog nga adlaw ana panumbalay
sa ugsadan ka laki nga kana namaypay –
luyag na magtiraw dayon kang kasulhay.
Dasig nagrapta ang kalayo –
wara’t nahimo ako kondi magpalagyo
samtang pirit ginasalbar ang akun painoino
paagi sa mga handurawan kag nabilin nga pagtoo.

Piro salamat hay nag-abot kaw dayon –
insakto gid nga higayon kag panahon
agud bas-un ang nagalunay ko nga baratyagun
kag nagadabadaba nga paraabuton.
Sarum-an, ako magabangon
halin sa dyang mga abo kang masubu nga nagligad
kag ang nabilin nga uring gamitun ko
sa pagraha ka bag-o nga paglaum imaw kanimo.

Migo Beloy daw latu ko run
kon andut napatay kaw
tatlo ka adlaw antis
ang Valentine’s day:
Gusto mo siguro ipamaan kanamun
nga ang pagpalangga
wara ti ginapili nga adlaw
kag bukun lang sangka adlaw
kondi dapat sa matag-adlaw.
Ukon basi luyag mo man ipakita
sa imong mga pinapalangga
nga ang gugma wara nagauntat
sa tatlo ka tinaga nga masami
ginatikab kang mga baba kag
ginapitik kang mainanggaun nga dila.
Kag basi buut mo man hambalun
nga ang gugma indi lamang makita
sa kaambung kang mga paraanggidan
nga tinaga
kondi sa pagkabuhi nga wara it dagta
kang kasakun kag pagpasipala –
bisan ginatos ka bala
indi makaguba.

I.

Wara run ti ginahud kag linupok:
dapug run lang kang naumido nga mga ribintador
nga wara madiparanhi ka manogsilhig sa plasa
ang nagapadumdum kanakun
ka mga tingadlaw kag tungang gabii
nga imaw kita nagsinggit, nagharakhak kag nagtumbo
sa kalipay katong masadya natun nga pag-imaway
sa diin, kaangay kang naglupad nga mga kwitis sa kahawaan,
ang atun mga handum nagtimbuok, naglupok, nawas-ag
kag sa tulad, kon sa diin run to nagtupa, indi ko maman-an.

II.

Wara run ti hamon kag bilog nga prutas sa pinggan kag lamisa:
ang tanan nga kanamit kag katam-is nga ginsaruhan ta
indi run mabatyagan ka dila – puro run lang sa huna-huna.
Kag lain run ang mabatyagan nga kaburusgon -
buta ang busong piro kalong ang baratyagun:
wara gali ti namit nga hamon ukon tam-is nga prutas
ang makabulong kang kagutum ka tagipusuon
kag, kaangay ka bilog nga prutas kag korti ka hamon,
sa gihapon nagalibot sa handurawan mo ang akun paminsarun.
Kon sarang ko lang daad dya lamunon para mag-untat run.

III.

Wara run ti mga ayam nga nagairihi kag kabataan nga nagahibi:
Nagguruwa run sanda sa andang ginpanaguan,
nagalinumbayag, nagaturutumbo kag nagadinalagan run
bangud ang nagbulus nga katawhay kag kalinung
paraiso kag musika sa andang kalibutan.
Kaangay ka dyang mga ayam kag kabataan
ginhibian ko man ang adlaw ka imong pagpamaalam,
nahadlukan man ako sa paraabuton nga wara ikaw
kag ginpirit ko manago sa mga haron ka atun nagligad.
Kadya, magwa run ako kag magpadayon.