|
Ano ayhan ang akun ibaylo Sa mga toro kang oran sa gisiun nga payong, Samtang ginasarub ang nagadanaw nga aragyan? Ano ayhan ang akun ibaylo Sa mga bakiras kag lanug sa butkun kag batiis, Samtang nagalagsanay sa bag-ong garab nga taramnan? Ano ayhan ang akun ibaylo Sa mga soyak kag sarubsub sa kahig kag alima, Samtang gapamorot kang toway sa kanipaan? Ano ayhan ang akun ibaylo Sa gakalamayo nga init ka sirak kang adlaw, Samtang nagalibud kang tinanuk kag balulu sa kabaryohan? Ano ayhan ang akun ibaylo Sa masapnut nga sabor kang kan-un, Samtang sa asin ginasamo kag ginasabawan? Ano ayhan ang akun ibaylo Sa korapun nga kingki kag nagaraboab nga moron, Samtang nagabasa kag nagasolat kang mga tinon-an sa iskwilahan? Mapin-ut nga inagyan, bisan budlay kag pigado Wara it manggad nga makasokol, indi ko gid pag-ibaylo, Ano man malab-ot ko, bahul nga parti ang sangka tion, Ang akun kabataan. |