Sikrit Mirid
ni Danny S. Tabuyan
Kang mabalo si Muroy nabilin kanana ang tatlo ka mga intuk pa nga kabataan, nga ang pinakagurang nagaidad pa lamang ka lima ka tuig kag ang agot mga santuig pa lang hay amo dya ang ginbata nga kinamatyan ka anang asawa.
Mabudlay para kay Muroy ang mag-atipan ka anang mga bata nga nagaisarahanun, ilabi pa gid nga may bata nga ginabatiti kag kinahanglan na ang mangita ka pangabuhian bilang sangka panday. Mayad lang nga rugyan ang anang nanay nga si Consing nga makasapupo ka anang mga bata. Ugaring indi sa tanan nga oras rugyan si nanay na hay nagapamaligya dya ka tabako kon sa diin may mga adlaw ka tyinda. Kon wara ti tyinda, ang ginahimo ni Consing amo ang magkay-ag kag maglimpyo ka minano kang tabako paagi sa pagpahid ka naog agud nga indi dya mag-agup-upun kag wisikan ka tubig ang mga pinanid ka tabako agud indi magkaging. Ginapilian na dya ka mga rabot agud bulagun sa mga ugat. Ang malum-uk nga pinanid ginalubid agud himuon nga maskada kag ang mga ugat ginapain kag ginatago hay duro ang nagapangayo nga ginasawsaw sa mainit nga lana ka niyog kag ipaturo sa kalunggo ukon sa lan-ag agud mapatay ang kagaw, ukon ginahuruman sa tubig agud iwisik sa mga tanum nga laswa kag bulak agud indi pagkapulan ka tigi-tigi kag ulod. Samtang nagakuti tana ka anang mga baraligya ana nga ginabataw-bataw ang mga bata.
Napinsaran ni Muroy nga kinahanglan ka anang mga bata ang bag-o nga nanay. Gani kang ana maman-an nga may nagbakasyon nga daraga sa mga pamalay sa baybay, nagpuropamangkot tana sa mga iningud kag kang urihi ana gid dya ginpangilala.
Indang ang anang ngaran. Ang anang lawas may manami nga kurbada kag ang tabyog ka anang balikawang kon maghayon-hayon daw hadok ka balud sa huyup ka amihan. Matandus nga bayi si Indang kag maatipanun sa anang mga hinablus kag masarigan sa nga hirikuton sa sulud ka balay. Amo dya ang nagpamakut sa pagmalyag ni Muroy sa daraga, bisan nga sa ikarwa lang nga halintang ang anang natapos sa pagtuon.
Wara magbuhay kag ginpangaluyagan ni Muroy si Indang, nga kang urihi nakadangat sa pagpamalayi. Nangatubang ang pamilya ni Indang sa pamilya ni Muroy kag anda nga ginkasugtan ang pagpakasal sa darwa nga pagahiwatun sa sunod nga pag-ugsad ka bulan.
Ginpamangkot ka tigbabayi ang nobya kon ano ang anang pangayuon para sa kasal.
“Gusto ko nga sikrit mirid lang,” sabat ni Indang. “Piro mayad gid tana nga may trahi nga labug, may banda nga magpamukaw sa kasanagun kag magsunod sa kasal halin sa balay paagto sa munisipyo kag pabalik sa balay, kag may ihaw gid nga baboy kag may litson para sa punsyon.”
Ginbaton kag ginsabat ka tiglalaki nga pangayo ni Indang. Masadya ang “sikrit mirid” nanday Indang kag Muroy hay gindugokan dya kang duro nga manugpamunsyon nga daw haros bilog nga baryo.
Ang paghangup gali ni Indang ka “secret marriage” amo ang kasal sa sibil.
- Katapusan -