Si Lola Maring
ni Arlene D. Nietes-Satapornvanit
Kang una nga wara pa ti internet, uso magpadara ka cassette tape agud makapamati ka hambal ka pamilya kon sa abrod ang pinalangga.
Sangka adlaw nakabaton si Neneng ka cassette tape halin sa balay nanda. Pagkatapos hambal ka ana mga ginikanan kag mga bugto, naghambal sunod ang ana nga lola. Si Lola Maring mga 80 run ang idad na.
“Neng, helow! Kamusta kaw dyan? Ay, wara nagasabat haw?” hambal ni Lola Maring.
“Sige lang, La, padayuna lang hambal.” Limug ni Acay, libayun ni Neneng, nga naabay sa pagrekord.
“Ay, gle, basi katurog pa bla haw si Neneng,” sabat ni Lola Maring. “Neng, Neng, bugtaw run dyan, ay. Dya ako sa balay nyo. Sabat run, ay. Andut wara nagasabat si Neneng haw?”
Samtang nagapamati, nagautuy-utuy ka kadlaw si Neneng, asta nga nagtururo ang anang luha kag sip-on nga liwat-liwat nga ginapamatian ang hambalanun ni Lola Maring.
- Katapusan -