Halin sa Baul: Ang Uma kag ang Tiknolohiya
ni Rev. Fr. Jose Glicerio C. Geremia
Pinili kag ginkay-ad ni Maria Milagros C. Geremia-Lachica
1. Ano Igma, Nay?
Si Cherry wara nagasapak ka sugo ni Nanay na bangud nawili sipal sa “touch screen” na nga silpon. Nagasaku si Nanay na ka himus ka andang igma. Nagaugtas hay wara gid magbulig kana si Cherry sa kusina.
Kang tag-irigma run, namangkot si Cherry, “Ano igma ta Nay?”
Nagsabat si Nanay na, “Igmaa silpon mo!”
2. Salamat sa Dyos
Si Art nagahulat sa anang amiga nga mag-abot. Samtang nagahulat sa bangkita sigi anang internet kag garut anang utot. Gabuntod anang busong kag sa kada utot na daw gamayad ang anang pamatyag gani garut man anang kuon, “Salamat sa Dyos.”
Nawili tana ka “surf” kag urihi na lang masapwan nga buhay run gali dyan nagatindug sa likod na ang anang amiga.
Nagtindug si Art kag namangkot, “Ka san-o pa ikaw rugyan?”
Nagsabat si Ann, “Ay, halin pa kaina sa una mo nga ’Salamat sa Dyos.’”
3. Lain Run Kadya
Nagaistorya si Max sa anang amigo, “Ay, lain run gid kadya ang bakiro kang sa kauna no?”
Si Ely namangkot, “Wanhaw?”
Naghambal si Max, “Kauna, gatongtong sa likod ka karbaw ang bakiro, gapamati drama sa transistor radyo. Kadya tana, gatungtong sa likod ka karbaw, gakaput ka tablet kag ga-selfie samtang gasaksak irpon sa anang talinga kag gapamati ka musika.”
4. “Evergreen”
Ang “Global Warming” nagadara kang bahul nga piligro sa kabuhi. Sa malawid nga tag-irinit nagaproblima ang mga bakiro kon ano ipaharab sa andang mga baka sa buy-an bangud kaging man ang mga hilamun.
Si Walter naghambal sa anang kaimaw, “Nami siguro bay paantiparahan ta ka green ang mga baka agud indi sanda mag-ula sa pagharab bisan laya run ang hilamon.”
5. Uli Run Lang Dya
Si Lolo indi makaintyindi ka ginahimo ka anang mga apo. Sige Skype ka anang apo sa andang Tatay rugto sa Saudi. Sa pagpaningadningad, nagparapit man ang Lolo kag nagturuk.
Sa anang kulba kag kaluoy nagkuon, “Ay, Berto, ginapriso gali kaw dyan sa sulud ka salaming? Kon amo man lang ra, uli kaw dya kanamun!”
- Katapusan -