Sugpon sa Ginhawa
ni Megan C. Lagordo
Alas-syiti sa aga, Lunis nga adlaw. Masaku ang tanan sa pagparik-parik paagto sa iskwilahan kag orubrahan. Tanan nagahimakas makakita ka anda kinawara. Magamo sa mga dalan. Trapik. Huud. May trapik run man sa probinsya. Nagaugtas run ang iba hay rapit lamang maurihi sa oras ka anda nga pagsulud sa obra. Nagasakay ako sa dyip. Buta. May nagakabit pa. Hingagaw nga makalambot timprano sa orubrahan kag buruthuan. Wara gid it swirti. Pag-abot sa banwa, haros wara run nagahulag ang mga sarakyan. Rapit lamang man mag-init ang akun ulo. Nag-agi kami sa plasa. Daw talipapa. Ang dalan, daw sungkaan. Amo run dya ang risulta ka mga nagapamahug nga tarpolin sa dalan: “This is where your taxes go.” Naminsar ako kon mabayad pa ako ka buhis kadya nga tuig. Basi ang buhis ko pa makapatay kanakun? Kon bukut sa disgrasya, sa alta-prisyon.
Hay, salamat! Naghulag run ang dyip. Oppps! Gulpi nagprino. Basi nakuyap ang drayber? Aw, wara man gali. May naglaktud nga bata. Mayad lang wara madab-ot. Gamay lang ako atakihun ka nirbyos. Mayad lang hay bukut man ako ang gamay lang mabungguan. Padayon sa sunod nga trapik. Sa masunod nga pagduyu ka dyip, nanutaran ko, raku gid man gali nga mga kabataan ang nagarinapta sa dalan aga pa. May nagapang-ukay ka basura, nagapanglimos sa mga nagaparanaw nga mga tawo, ang iban nagaay-ay ka anda nga mga palad sa bintana ka mga sarakyan. Diin ayhan ang mga ginikanan nanda kadya? Basi turog pa. May nagparapit sa bintana ka amun ginasakyan nga dyip, marapit kanakun. Ah, siguro taw-an dya ka maalwan ko nga ingud. Daw kaina pa man kadya rosaryo na mong.
“Nay, bisan paramahaw lang daad ka akun libayun. Kabii pa kami wara kakaun,” pakitluoy ka bata.
“Wara gani takun namata hay tamad takun mamroblima kara. Dya rosarito, pangamuyo kamo to nga taw-an na kamo kang kan-un sa adlaw-adlaw. Kamo run bahala sa dapli!” ang sabat ka bayi sa akun tupad.
Nge? Pag-un si Manding ba. Piro, ginbaton gyapon ka bata ang rosarito. Gintao ko lamang ang tunga sa botilya ko nga tubig kag ang nabilin nga darwambilog nga pandilitsi. Amo lang to man daad pamahaw ko, piro sigi lamang. Mangamuyo lang pa gid ako ka kan-un ko sa adlaw-adlaw. Ako run bahala sa dapli.
Nag-andar pa gid ang mga sarakyan. Nag-agto run sa binit-karsada ang bata kag ang ana nga libayun. Gintungtong na sa siminto ang pinangalimusan na sa dalan. Ginkaun na ang sangka tinapay. Bilog na nga ginlumuy. Ang sara gintunga na kag ginhungit sa anang libayun ang sangtunga. Lab-ok ka tubig halin sa botilya. Ginpalab-ok na man ang ana libayun, tunga lang. Nagtindug ang bata samtang ginakungkung ang ana libayun. Mapanaw run tana. Nabilin sa binit-karsada ang rosarito.
- Katapusan -