Simana Santa
ni Arlene D. Nietes-Satapornvanit
Kada tuig ang Simbahan Kristyano may ginahiwat nga silibrasyon nga importanti sa atun nga pagtuo: ang Simana Santa. Kadya nga tuig, ang Simana Santa ginahiwat halin sa Marso 29 para sa Domingo de Ramos, asta sa Abril 5, ang Domingo kang Pagkabanhaw.
Makuon ang iba nga, “Abu, andut sangka simana gid haw? Lawig-lawig man ra ba nga kahiwatan?”
Andut nga may Simana Santa? Ano dya kon sayudon? Andut nga importanti gid dya nga pagpamalandong?
Mabasahan natun sa Bibliya ang mga nagkaratabo mga sobra darwa run ka libo ka tuig ang nagligad, sa mga libro nanday Mateo (26-28), Marcos (14-16), Lucas (22-24) kag Juan (12-20). Amo dya ang atun ginapinsar kag ginapamalandungan kada Simana Santa. Parti dya sa urihi nga mga inadlaw sa kabuhi ni Ginoong Hesukristo rugya sa kalibutan. Sa mga inadlaw nga dya, ang plano kang Ginoo para sa kahilwayan kang mga katawhan sa andang mga sala natuman. Ang plano kang paghilway sa atun mga sala halin pa kang una sa pagsala kang atun mga una nga mga ginikanan, si Adan kag si Eba.
Ang atun mga sala ang nagapugung kanatun nga magparapit sa Ginoo kag makabaton kang grasya nga langitnun. Tungud sagrado ang Ginoo kag indi makaturuk sa sala, bahul dya nga bagay tungud nautod ang atun rilasyon sa Ginoo. Kamatayun kang atun ispirito kag wara kita ti paglaum nga makabalik sa mayad nga grasya kag kabuhi nga wara ti katapusan sa langit, kon diin tanan mayad kag masadya. Impyerno ang atun agtunan, kon diin puro pag-antus ang mabatyagan tungud sa init kang kalayo.
Gani, agud nga mabalik ang atun rilasyun tungud sa bahul na nga pagpalangga kanatun, ang Ginoo mismo nagtugro kang paagi. Kita nga makasasala wara gid ti mahimo agud madura ang atun mga sala. Ang wara lang gid ti sala amo ang makapanas kang mga sala kang katawhan. Sa gahum kang Ginoo nga naghimo kanatun, tana lang ang may paagi nga mahilway kita sa atun mga sala. Gani si Hesukristo nag-abot sa kalibutan halin sa langit agud magtugro kang aragyan kag paagi nga magbalik ang mga tawo sa Dyos. Si Hesukristo nga Ginoo gid lamang ang makahilway kanatun sa atun mga sala, tungud tana lang ang wara ti sala.
Paagi sa ana nga pagsakripisyo kang ana nga kabuhi, sa kalbaryo kag sa paglansang sa krus, tana ang nag-ako kang atun mga sala, imbis nga kita ang mag-antos kag padayon nga mautod ang rilasyon sa Ginoo. Sa ana nga pagkamatay sa krus, ginpas-an na ang tanan nga mga sala kang mga tawo sa kalibutan. Bisan natabo dya sobra darwa run ka libo ka tuig ang nagligad, abay ang tanan nga mga tawo halin kato asta kadya, kag amo man sa mga sunod nga mga tinuig. Asta sa tinion nga plano ni Hesukristo nga magbalik rugya sa kalibutan agud mapatindug ang ana nga ginharian.
Mahimo na dya tungud tana Ginoo nga gamhanan. Kag tungud gamhaman, wara tana nagpabilin nga patay. Pagkatapos kang tatlo ka adlaw nga dya natabo, si Hesukristo nabanhaw! Daw ano bala nga milagro sa mata kang mga tawo? Ang ginawi kang Ginoo lain sa ginawi natun, amo ra kis-a indi natun mahangpan kon ano ang nagakaratabo nga langitnun. Kinahanglan natun ang pagtuo, agud mabaton natun ang dya nga kamatuoran. Nagatugro dya kang paglaum kanatun, kang kabuhi nga langitnun.
Sa kadya nga Simana Santa, atun paminsarun kag pamalandungun ang mga hitabo nga dya. Labaw pa dya sa tanan nga mga kaaram nga atun naman-an rugya sa kalibutan. Labaw pa dya sa tanan nga mga manggad nga mahimo natun maagum. Indi masolbar ang atun mga sala sa pag-intra-intra lang sa mga prusisyon kag pabitay-bitay. Tungud parti tana dya sa langitnun nga pagpangabuhi nga makaapikto kang atun lawas kag ispiritu sa sunod nga kabuhi nga wara run kita rugya sa kalibutan. Gani mas importanti tana dya sangsa tanan nga mga butang nga kalibutanun. Kada sara kanatun may ana nga paminsarun kag disisyon sa pagpili kon diin tana gusto mag-agto pagkatapos kang kabuhi rugya sa kalibutan.
Ano ang imo piliun?
- Katapusan -