Si Hudas
ni Mark Anthony Q. Orquejo
Sa istorya kang Bibliya, may kaugut ako nga ginabatyag para kay Hudas Eskaryote. Tungud kana napatay si Hesus. Daw kwarta ang paglantaw ko kay Hudas sa pagbaligya na kay Hesus kag ginakabig ko nga bukut takus tana nga mangin isara sa mga apostoles ni Hesus.
Ang pamangkot ko sa akun kaugalingun amo nga andut abi maugut ako kay Hudas nga sa pagkamatuod nangin bahul ang anang parte sa kaluwasan kang katawhan. Tungud kana natuman ang mga ginsaad kang propeta nga matabo kay Hesus, kag kang napatay si Hesus nakaangkun kita kang kaluwasan.
Ano gid bala ka lain si Hudas? Husto bala nga kondinarun ang anang pagkatawo kag ang anang ngaran?
Sa kada Semana Santa, atun ginapamalandong ang pasyon ni Hesus. Amo man dya ang tion nga ginakondinar natun si Hudas paagi sa pagsunog kana sa atubang kang publiko nga nangin tradisyon run man natun. Si Hudas ginabitay kag ginatutdan asta mangin abo kag ang kwarta sa anang puyo-puyo ginaaragawan kang mga tawo. Nagapakita nga kita may pagkasakun man sa kwarta.
Nangin kostumbre run natun nga ang mga tawo nga atun ginakabig nga traidor, ginatawag natun nga Hudas. Ang Hudas nga ngaran sa kadyang moderno nga panahon nagasimbolo kang makasasala. Sa kaduruhon, daw amo lang ra ang pinaka papel ni Hudas. Wara ti kamayad nga makita kay Hudas.
Pero kon atun gid pinsarun, ang tion kang Semana Sanda tion man daad sa pagpasalamat kay Hudas bisan pa nga indi natun mabaton ang anang ginhimo kay Hesus. Sa anang pagbaligya kay Hesus, nabakal ang atun kaluwasan. Si Hudas ang gintugruan kang amo dya nga papel para matuman ang dapat matabo kay Hesus.
Mabag-o ayhan ang atun paglantaw kon sa iba nga apostoles gintakna ang pagbaligya kay Hesus?
Andut wara tana natun ginakaugtan ang ginhimo ni Pedro? Ginpanginwara na si Hesus. Ang iba man nga mga apostoles wara nakipagbato para kay Hesus. Natabo dya tanan hay amo dya ang nasaad nga matabo, kag amo man ang kay Hudas. Pero tana gid ang nasintruhan kang pagkundinar tubtub sa kadya nga moderno nga panahon.
May kinamatarung gid bala kita sa pagkondinar kay Hudas?
Kon atun paminsarun kag padalman, ang tagsa-tagsa ka mga apostoles may mga mayad nga binuhatan kag importante nga papel, amo gani nga sanda ang ginpili sa kaduruhon nga gusto mangin apostoles ni Hesus. Si Hudas indi aksidente nga ginpili ni Hesus. Ginpili tana agud mangin parte kang kaluwasan nga ginatigana kang Diyos para kanatun paagi kay Hesus.
Sa dyang Semana Santa, magpasalamat kita sa kaluwasan nga ginregalo kanatun kang Diyos paagi kay Hesus. Amo man daad sa nangin papel ni Hudas sa dyang kaluwasan nga atun naangkun.
Tanan kita nagakasala parehas ni Hudas kag tanan kita may mga papel sa dyang kalibutan nga sa piyak kang atun pagkamakasasala, may mayad gid nga madulot sa atun isigkatawo kag sa kadam-an.
- Katapusan -
* Litrato: Halin sa http://www.coinreplicas.com/shop-ancient-coins/judean-biblical-coins.