Sa Likod kang Karo ni Hesus Nazareno
ni Stephen Louie R. Checa
Daw kasan-o lang nga imaw kita nagprusisyon palibot sa banwa
Ginsundan ta ang karo ni Hesus de la Pasensya
Bangud sa pihak kang tanan nga pagpasipala
Tana gihapon ang hari nga nagapasiga kang atun kandila
Daw kita kag ang ginsaruhan ta nga paghigugma:
Matam-is bisan buta kang pagtamay kag tunukun nga korona.
Kag kadya nga wara run ikaw, ginsundan ko
Ang karo ni Hesus nga Nazareno
Nadumduman ko ang kabug-at kang krus kag kalibutan
Kang imo ako ginsikway kag ginpabay-an.
Ang akun baratyagun gulpi lang naghagung
Kaangay kang akun mga nakita kag nabatian:
Mga bata nga nagahirinibi bangud nga kapoy kag nagutman.
Mga soltero nga nagapangita kang daraga nga masyaran.
Mga daraga nga nagapaduding sa gwapo sa unahan.
Mga mal-am nga nagaugtas bangud sa ingud nga wakalan.
Mga magnobyo nga nagakum-anay sa dalan.
Mga narsistiko nga nagaselpi bisan nagakarasandad kag ginabungguan.
Mga maggulpi gasinggit bangud ang kahig, kang kandila naturuan.
Mga nagaprusisyon pero ang mainit nga bingka ang ginapamalikdan.
Mga darayawun nga ang pamalandong kag pagtuo ang ginakabangdan.
Tawga ako nga paramantay kag salimpapaw, pero bukun man takun but-anan
Pero salamat sa dyang mga gahud kag imong ginsala nga handumanan
Daad sa harum-an, sa paggarahe kang dyang mga karo
Mangin kaangay ko ang Mater Dolorosa kag Santo Entierro
Nga sa pihak kang kamatuoran nga wara run ti ikaw kag ako
Magabanhaw sa ikatlo ka adlaw ang natublag ko nga baratyagun kag pagtuo.
* Litrato: Halin sa http://4.bp.blogspot.com/_qoUwETXaAb0/S6PNgngM87I/AAAAAAAANSs/tjSe7NoiOnI/s1600-h/Lumang+prusisyon-1.jpg.