Bidang
ni Danny S. Tabuyan
Nagalinagapok ang daw sonata nga tunog ka tiral sa balkon nga kawayan ka balay ni Ikang. Ana nga ginahabul ang mga pino kag pinili nga lanot halin sa ginkigi kag ginbalbal ka anang bana nga si Osing agud maglum-uk. Ginakalitan na ang paghuman ka bidang nga ana inogpandong kag inogkunup nga inogsangga na sa anang kimono nga sinamay kag duag lila nga may borda nga morado kag patadyong nga naga-inggat sa kaitum hay linugum sa tagum kag gin-amidolan ka baskug kag binalbal, agud isuksok nana kon magsimba tana sa Simana Santa.
Si Osing, simpli lang nga manogkigi ka lanot kag manoghimo ka kalat kag ginabaligya sa banwa. Si Ikang manoghabul ka patadyong kag sinamay nga ginakumpra man kang mga tagabanwa nga mga manogbolanti ka mga tila. Pariho sanda nga yano lang ang pagkabuhi. Bisan sa andang kapobrihun wara sanda nagalikaw ukon nagakumod kon may nagaparapit kananda sa pagpangayo ka bulig. May mayad sanda ti panimuut kag may bunayag nga kaalwan, nga bisan ang pagkaon nga anda run lang itimo, anda pa itugro kon may magpangayo. Bisan ang andang mga himata kag mga kilala, nagamuno kananda nahanungud sa andang tam-an nga pagkaalwan.
“Ano lamang run bay ang mabilin kaninyo hay bisan ang sangkidit nga rugyan kaninyo ginatugro nyo pa sa iba?”
Nagayuhum-yuhum lang ang mag-asawa nga nagasabat, “Pabay-i lang, hay mas bahul ang kinahanglan nanda sangsa kanamun.”
Wara sanda ti bata, amo ra nga ang iba nagakuon, “Mayad lang nga wara kamo ti bata, hay kon may dyan mabudlayan gid kamo, hay malaghap tinyo para sa inyo mga kinahanglanun.”
“Amo ria gani siguro nga wara kami gintugroan ka mga bata agud mahulas kanamun ang magbulig sa mga nagakinahanglan kag agud indi kami magpanumdum kang amun kaugalingun. Kag tanhaga man, wara man kami magutuman, ukon namarhan ang amun burugasan,” ang malulo nga sabat ni Ikang.
Mapainubusun man nga nagsabat ni Osing. “Kag wara man kami ginatak-an magbulig hay wara man bay ginatak-an ang Ginoo magtugro kanamun. Ti, aragyan man lang kami ka mga bugay ka Dyos para kananda.”
Ang nagatulud ka dyang mag-asawa sa andang mayad nga mga buhat kag panimuut amo ang andang madalum nga kaangtanan sa Dyos. Tungud sa pagkamapinangamuyuon nanda nagapanarupsup ang grasya ka Dyos sa andang kabuhi. Daw haros ang tanan nanda nga ginahimo nagapahayag kang kaayad kag kabalaka ka Makaako.
Byirnis Santo, mga alas dos sa hapon, nagadalidali ang mag-asawa nga nagpanaw pabanwa hay mahingabot ka silibrasyon sa simbahan nga magaumpisa sa alas tris. Suksok ni Osing ang anang sinamay nga barong. Si Ikang suksok na ang anang ginpriparar nga patayong nga binalbal kag kimona nga lila, kag ana ginapandong ang bidang nga ana ginhabul.
Kang nakaabot sanda sa baba ka banwa marapit sa mga kanipaan, anda nakita ang tawo nga nagabulidbulid sa binit kang karsada. Dumdum nanda nga lingin lang nga indi run makadara ka anang lawas. Anda nga ginparapitan kag ginbistahan, kag anda nasapwan nga pilasun gali ang tawo kag nagarigos ka anang dugo, nga basi ginbanggaan ka mga lingin kag ginbayaan nga lipung. Maaslug ang dugo nga nagailig halin sa pilas ka anang ulo. Dalidali kag wara ti pangalag-ag nga ginpiud ni Ikang ang anang aliali nga bidang kag ginbugkus dya sa ulo kang tawo. Ginbilin na si Osing nga agud magbantay sa tawo kag nagdiritso tana sa banwa agud magpangayo ka tabang.
Ginhatud nanda ang tawo sa hospital kag anda ginpat-ud nga mayad run ang kahimtangan ka dya antis sanda magpanaw. Gin-uli ka doktor kay Ikang ang bidang nga ginbugkus sa ulo ka tawo. Ginbaruron na lang dya hay nabulit ka dugo, sa tuyo nga bunakan na kon makauli sanda. Madiritso raad sanda sa simbahan piro wara run nanda maabutan ang silibrasyon kag nagasug-alaw run sanda sa prusisyon. Nagahinugon gid sanda nga wara sanda makaabot kang tuigan nga kahiwatan ka Pagkasakit kag Pagkamatay ka Ginoo. Nagtawas lamang sanda sa prusisyon.
Nagpundo ang prusisyon sa ikaanum nga kapiya. Mabatian ang nagapanguna ka pangadi:
“Ikan-um nga istasyon. Si Veronica nagapahid ka oyahun ni Jesus.”
“Nagasimba kag nagapasalamat kami kanimo, O, Jesus!”
Kag nagsabat ang mga tawo, “Hay tungud sa Imo krus gintubus mo ang kalibutan.”
Nakita ni Ikang ang larawan sa sulud ka kapiya kag ana ginpamalandungan. Nahangpan ni Ikang nga iki lang ang ginhimo ni Veronica nga pagpahid ka balhas kag dugo sa oyahun ni Kristo, piro bahul ang balus ka anang gugma, nga ginpatapik ka Ginoo ang anang itsura sa panyo ni Veronica.
Kang makauli sanda, makalit raad si Ikang nga bunakan ang bidang, ugaring kang ana dya ginhumlad, nagmurarat ang anang mga mata sa anang nakita kag gintawag na man si Osing kag ginpakita ang bidang. Ang bulit ka dugo nagporma sa laragway ni Kristo.
Ang Ginoo naghambal sa andang tagipusoon, “Kamo ang akun Veronica, ang akun matuod nga mga laragway.”
- Katapusan -