|
Bisan sa pagtorog, Nagapaotaw-otaw Ang magalung nga paminsarun Sa lawud ka paramangkotanun. Sa diin ayhan ikaw nagtupa Nga daw tinoro ka oran Sa tunga kang kadagatan? Bisan sa oran gid lamang Kon makaasik man ikaw Sa akun tampaan, Agud salodon sa tambibi Pinugtak ka imong tarithi. Mabog-os lamang liwan Ang imong pagkatobig, Sa palad ka mga pangako. Sa imo nga pag-ilig, Ginadab-ot ang langit, Sa imong pagkarayu, Nga daw mga bitoon Sa ponghaun nga oyahun Ka pinawpinawun Nga kalangitan. Salodon ko gihapon, Ikaw, bolalakaw, Sa imong pagkaholog, Bisan magkarapaso pa ako, Okon magkarasonog, Magoraptan ko lamang ikaw liwan Sa badlit kang kapalaran. Litik man ayhan sa panumduman Ka boong nga tagiposoon, Mabalik lamang ikaw liwan Sa sabak ka akun paglaum. |