|
Dakpa ako Sa haron kang kagab-ihun. Kapti ang akun mga loha – Maramig pa sa hunub ka maalabaab nga lopa. Isipa pinanid ka akun mga miruk – Nagporospos run ka polaw sa pagkamukmuk. Hawidi ang akun mga palad – Para run ang badlit ka mga panaad. Batyaga ang pitik ka akun tagiposoon – Baskug pa ayhan tubtub magkabogwasun. Pamatii ang pitik ka akun mga polso – Nagadungan pa ayhan sa lagtik ka rilo. Isipa ang bohos ka oran halin sa langit – Nagasogid ria sanda ka akun mga kasakit. Magansal matood, limug ka daguub – Pangara ria ka Ginoo halin sa panganod. Masariit, daw ispada, kodlis ka kilat, mainit pa sa baga – Amo ria ka hapdi, pamatmat sa inyong konsyinsya. Ginagutum ako kaona, sa hostisya, Wara ninyo ako ka hosto pagtratoha. Ginaohaw sa pagpalangga kag pagkabalaka – Wara ako pagpamatii, wara ako pagsapaka. Kaparihas kay Hesukristo – Gintonghol pa gani ako ka apdo kag bino. Ka mga pagpabungulbungul, Kag mga pagpabolagbolag kag pagpakonokono. Di maisip mga pilas sa akun lawas – Rugyan nakatago, mga kasakit nga akun ginbatas. Ikaw lang, Ginoo, makahapohap, pilas ka akun pagkapaslaw Ikaw lang, Ginoo, makasombad ka akun nga kamingaw. Imawi, kag batona ako, Ginoo ko, sa akun nga pagtinga, Kalag ko, gakalangkag, sa langit, kanimo nagatangra. |