|
Nagtakup ang adlawun Nga mahinandumun Sa palad ka mga pangako Nga akun ginakumkum – Malipayun kag madinarag-un Ang mga baratyagun, Sa dughan nagalokonlokon. Akun ikaw ginsaolo Homalin sa kitin Tubtub sa olo, Nga labing mainandamun – Hay nakahanda gid ako, Nga kanimo mag-onong. Kag sa pagtonod Ka adlaw, Akun ikaw ginapaminsar, Ginpinta sa langit Nanarisari mo nga doag, Nga daw sangka balangaw Nga kanakun nagalantaw. Nagadulum ang kagab-ihun, Akun ikaw ginaangan-angan, Kag sa akun katoroywon, Akun run lamang ikaw ginadamgo Sa palad ka akun dughan. Kag dayon ako magbangon, Kag ginhak-un ka pauyuk-uyuk, Ang nanarisari nga mga dapug Kang kabolakan kag mga katamnan Sa sulud ka akun paminsarun. Maoli pa bala ikaw ayhan, Okon sa harum-an run lamang? Gintangra ko ang langit – Wara run ti bolan, Piro sa mga dahon kag ton-og, Ikaw gid akun mabatyagan. Daw byahi ka sangka iroplano Paagto sa planita nga Pluto Ang imong pagkarayu, Piro sa tinoro ka mga ton-og, Nga daw sa mga loha, Marapit lang ikaw gali, Nga sarang mahapohap Ka panuruk, sa tobig. Nga daw sa ilig Ka toboran, Nga padayon ako ginaimawan, Sa wara’t katubtuban. |