Ako kag ang Valentine’s Day
ni Stephen Louie R. Checa
Madayon gid ang Valentine’s Day, kag sa amo nga adlaw magaisarahanun ako.
Kag sigurado gid ako nga sa amo man nga adlaw, isarahanun ko nga lantawun ang pagsinumbali kang pareho ko nga mga laki sa tindahan kang bulak, tsokolate kag “stuff toy” agud makahingagaw ka bakal kang turogro sa andang mga kahigugma ukon ginahigugma, sa tampad man ukon likum nga pamaagi.
Sigurado man ako nga isarahanun ko nga lantawun ang pagtambi-palad kang mga nagahigugmaanay samtang nagapasad kang andang mga handum kag nagahulat kang andang mga order sa sangka manami kag marahalun nga restawran ukon sa simple nga karan-an ukon burger joint sa binit karsada.
Ginapanuruk ko man ang mga yuhum kag mabatian ko run ang mahagpok nga harakhak kang magnobyo sa EBJ Freedom Park samtang isarahanun takun nga magakaun kang pisbol kag kikiam, kag mapadalundun kang fruit shake nga ang karamig nagalapos sa akun tagipusuon.
Sa paraabuton nga Pebrero katorse wara takun ti nobya nga iharkan, wara ti palad nga kum-un, wara ti butkun nga kupkupan, kag buhok nga kuhapun. Wara ako ti sabayun magsaot sa pagtukar kang sonata kang paghigugma sa nasambit nga adlaw. Kag kon mag-uran man sa amo nga adlaw, ako lang isara sa akun payong.
Pero sa pihak kang tanan, mangin malipayun ako sa gihapon sa amo nga adlaw.
Sa edad ko nga traynta anyos, duro run nga Pebrero katorse ang nag-agi sa akun kabuhi kag duro run nga Valentine’s Day ang akun nasaulog kaimaw sa mga kahigugma, ginhigugma, ukon ginapalangga nga naglisensya, mga nangbiya, ginbayaan, kag nagkaradura. Duro run man nga bulak, tsokolate, kag stuff toys ang akun nabakal kag kapira run man ako mapuling ka glitter dust sa paghimo kang Valentine’s card. Tamad takun kang ginabakal parehas kang ana ka Hallmark hay ang nasulat bukun ti orihinal nga dikta kang akun pinsar kag tagipusuon. Tandai nyo nga wara ti sikwawi nga tinaga sa tuod nga pagpahayag kang baratyagun.
Kapira run man ka beses nga nagguwa-sulud ako sa mga restawran imaw kang akun mga (duro run bay) kadeyt sa mga nagligad nga Valentine’s Day. Nakaagi man ako nga nagkaun imaw kang akun kadeyt kang pisbol kag shake sa plasa kon alang-alang gid ang sulud ka akun bulsa hay sunod adlaw pa ang sweldo. Sa laktud nga istorya, bukun run bag-o kanakun ang ginatawag nga Valentine’s Day nga dya.
Huud, kapira run ako nagpalangga kag duro run man ang akun ginpalangga. Kapira run man ako nalipay kag naghugyaw sa Valentine’s Day. Pamatyag ko gani kauna daw nagparanaog ang mga anghel halin sa langit kada ika-katorse kang Pebrero.
Pero bukun tanan nga Valentine’s day sa akun kabuhi masadya. Kon kapira ako nagpalangga kag kon ano ka duro ang ginpalangga ko, amo man ria kaduro ang higayon nga ang akun tagipusoon napilas, nabuka, kag nagdugo. Pira run man ka Valentine’s Day ang nag-agi sa diin bilog nga adlaw nagpamurot lang ako kang mga handum kag mga panaad namun kang akun pinalangga nga nagkarawas-ag kag nagkararumud. Naagahan lang takun ka tipon pero wara ko gid napadukut kag nabalik ang tong mgahandum kag panaad. Ginpanablug ko run lang kag ginpirit nga ipanglubung sa buho kang nagligad. Duro run man nga Valentine’s Day nga isarahanun ako nga nagpanimuron kang kapay, nagkupkup sa ulunan kag naghibi. Sa mabugu nga sugid, kapira run ako napaslawan kag nasakitan samtang ang iba nagahugyaw sa adlaw kang paghigugma.
Ugaring amo gid man gali diya ang kabuhi. Bukun tanan nga Valentine’s Day masadya kag bukun tanan nga pagsamput kang Pebrero katorse may kahigugma ukon kaimaw ang sangka tinuga. Ang Valentine’s Day gali kaangay man lang kang iban nga adlaw parehas kang Krismas, Pista Minatay, kag Semana Santa. Sa kaadlawan mo, pwede kaw mangin mahigugmaun ukon masakitan. Kag ang ordinaryo nga adlaw, pwede gali nga mangin daw Valentine’s Day kon buta kang gugma ang atun tagipusuon.
Para kanakun, wara ti kaso kon “single” kag nagaisarahanun sa pag-abot kang Valentine’s Day. May asawa ukon bana, nobyo ukon nobya, laon, balo ukon binayaan man ikaw, madayon gid tana ang Valentine’s Day. Hay kon indi, duro gid nga mga tag-iya kang restawran, negosyante kang tsokoleyt, stuff toys kag bulak ang maugut. Lahug lang dya pero tuod. Ang gusto ko hambalun, mabuhi man ako gihapon bisan nagaisarahanun ukon wara ti kadeyt sa Valentine’s Day. Tam-an ka bugu ang baynte kwatro oras kang Pebrero katorse kumparar sa pira ka adlaw, bulan, kag tuig nga nag-isarahanun ako. Kon ano ako ka sigurado nga magaturog ako nga isarahanun sa amo nga adlaw, amo man ako ka sigurado nga magabugtaw ako sa dason nga adlaw sa sangka ordinary pero buta kang paglaum nga kabuhi.
Sa paraabuton nga Pebrero katorse, tuig dos mil katorse, madayon gid ang Valentine’s Day.
Mapadayon lang takun sa pagkabuhi, pagpasalamat, pagpalangga, paglaum, pagpangamuyo kag pagsaot sa pihak kang pag-isarahanun.
- Katapusan -