|
Gapaoli dun ang kalabanan samtang ako bag-ong bogtaw Nagrigos, nagpahamot pagkasalup ka adlaw; Masanag dun ang bolan kag mga solo sa karsada Mga takong ko nagalagatok, tion duman mangita kang kwarta. Sa landong ka mga bitoon ako nagapanaw May manihol, may nanitsit, may kinyintos ayhan ikaw? Kolang? Pwidi run da, panggatas ka bata ko sa rum-an Bolong ni Nanay sa TB, kag balon sa iskwilahan. Bisan diin mo lantawun, indi manami mangin prosti Piro anhon ko, amo lang dya naman-an ko nga paagi; Nasoya kaw kanakun? Mahigku ako nga tawo? Kamaan kaw bala ka istorya ka kabohi ko? Kag sa akun pagliko sa madulum nga aragyan Butkun ko ang ginbutung, alima ko ang ginhigtan; Naman-an nyo dun sigoro ang akun nangin bwas-damlag Sa rum-an sa aga, basi pa lang, sa piryodiko anda ibalhag. |