|
Daw ano bala kasadya maglantaw girahay sa sini? Magahud nga mga posil, mga lopok nga nagapogati; Bata pa ako asta kadya, makarilingaw tana lantawun Piro ako bala nakamaan ka anda tood nga rason? Wara pa ako matawo, may gyira dun sa Mindanao Mga Moros kag NPA, ribildi sa kabokidan, Mga militar kag kapolisan; wara ontat nga galung, San-o pa ayhan maabot ginapangamoyo nga kalinung? Ano bala ang ginahingabot kang kada partido? Dya ayhan tungud sa prinsipyo okon ginhimo dun nga nigosyo? Anda ayhan natalopangdan ang intiris ka mga sibilyan? Ang away kag patyanay, wara ti matogro nga kahilwayan. Ang pagpati ko kag pagpati mo indi kinahanglan waslikan ka dogo Paghonos kabohi ka iban indi paghimoa tinotoyo; Palihog bisan sangka bis lang kami inyo pamatian Kami nga indi maluyag ka gamo, kami nga sa binit lamang. |