|
Kasadya ang masangtan ang paghandoraw kang kaapohan sa mga nagriligad nga ginbayaan ka kamal-aman Patas kang karito ni Lolo Wakin nga nahimo sa kawayan ang rowida nga salsalun darwa sa likod kag sara sa atobangan, may karaptan nga ginatolod kapin pa kon bug-at ang mga ginkarga nga pangsognod sa mga sinin-ad Gaburun-a ang mga apo ka tolod sara, darwa, tatlo, hala pwirsa dara hakwat paibabaw kang karaptan lingling sa idalum basi may bahul nga bato nga nagkalso sa pagpatokad sa karsada nga aragyan hay daw kabundul ka mga rowida bisan pa bag-o lang ginhugtan ka tornilyo Hugut nga bilin ni Nanay, indi pagsipalan, indi pagsakyan ang karito nga ginaadiadi gid ka mal-am Indi gid pagbuy-an sa pil-as kag mag-intra ka dalagan hay maguba gani ang kahoy nga lawas bisan pa gadokoydokoy manglagas gid si Lolo ninyo ka ispading nga nakasokbit sa anang lawas. Indi run kamo magsipal kag maglagsanay ang paliwanliwan man nga bilin ni Tatay ang langas ipaiway tolod lang ka matawhay makaabot gid bisan gahinayhinay ang torolaun kag tirig-angun makahulat sa balay. |