Baso kang Paglaum
ni Mark Anthony Q. Orquejo
Ang determinasyon kang atun tagipusuon indi masukol kang iba luwas lamang sa sara. Duro ang mga tion nga makahambal kita nga daw tama run, indi run kita makaagwanta. Kis-a atun mapinsaran nga indi patas ang pag-abiabi kang kabuhi hay tungud haros adlaw-adlaw ang kasakit kag pag-antos nagaimaw kanatun. Ang paglaum nga anay nagatugro kaisug kanatun nagaamat-amat dura kag kita nga mga katawhan nanglas-ay sa kabuhi nga anay buta kang kalipay.
Pero sa pihak kag tanan, ang atun tagipusuon, nagahimo kang mga pamaagi nga indi kita magliw-as sa aragyan kang kabuhi nga may buta kang kalipay kag determinasyon. Kon ang atun baso kang paglaum nahubsan run, ang atun tagipusuon padayon nagatugro kang kalipay agud indi lang kita maduraan kang paglaum.
Nangin boluntaryo nga matam-is nga panakut ang atun tagipusuon sa tion nga kita naduraan kang pang-unaw sa kasadya kang kabuhi bangud sa kapait kang mga pagtiraw nga atun nasug-alaw. Wara it tion nga ang dyang atun tagipusuon nagreklamo ukon nagtinamad sa mga pagtiraw kang panahon, rason kon andut may kaisug kita nga ginadara hasta kadya.
Ang atun tagipusuon ang pinakamapisan nga parti kang atun pagkatawo. Kon ano man ang mga kasakit ukon mga pagtiraw sa atun kabuhi, ang atun tagipusuon nagabatyag kaimaw natun kag sa anang kada pitik, pagpalangga ang mensahe nga ginapaabot na kanatun.
Sa urihi, ang paghangup magatudlo kanatun nga kon daw ano kanami nga ang tagsa-tagsa kanatun may ana nga tagipusuon nga ginaangkun. Wara it rason nga kita maduraan kang paglaum.
* Litrato: Halin sa http://www.surfexcel.in/wp-content/uploads/grass_with_water_drop_10669171.jpg.