Ang Kabuhi kang Pangayaw
ni Mark Anthony Q. Orquejo
Kaluya kag kahidlaw ang masami nga nagaabi-abi sa kabuhi kang sangka pangayaw. Ang reyalidad nga marayu sa pamilya kag mga abyan nga kaimaw halin kang kabataan, nagatugro kang kapin-ut sa naluyahan nga baratyagun. Indi basta-basta ang mga pagtiraw nga ginapangatubang kang sangka pangayaw. Duro ang mga butang nga dapat paayunan kag intindihun bisan pa nga kon kis-a daw sikwawi sa anang pagpati.
Ang pagpakig-angay kang pangayaw sa ginatawag nga kultura kang iban daw sangka mapait nga bulong nga pirit ginapainum para bisan paano indi matam-an ka pagpangabudlay. Wara ti labut pa ang mga nagakalain-lain nga pagsinarayo kang mga tumanduk nga ginahimuratan intindi kang sangka pangayaw para malikawan ang gamo.
Sa paglantaw kang iban, matawhay ang kabuhi kang nagapangayaw ilabi run gid sa mga pungsod nga mauswagun. Masadya nga mga litrato lang ang makita kag mga yuhum nga daw wara lang ti problema. Ang indi nanda makita ang mga pag-antos kag pagsakripisyo nga ginabatas adlaw-adlaw. Wara nanda maintindihan nga ang pagpangayaw indi lang para maglagaw-lagaw.
Sa pihak nga bahin, swerte gid nga sa kadyang moderno nga panahon, mahulas kag madasig ang komunikasyon. Madasig bulngon ang nahidlaw nga baratyagun. Ang kamingaw nga ginabatyag nagahagan-hagan sa kada tion nga ang pamilya, amigo, kag amiga makapangamusta. Masami amo gid dya ang mga butang nga nagatugro kaisug kag kabaskug sa kabuhi kang sangka pangayaw. Nagatugro dya kang inspirasyon sa andang matag-adlaw nga hirikuton.
*Litrato: Himo ni Van Gogh halin sa http://steeplemedia.com/blogs/junk_drawer/archive/2008/04/04/mystery-painting-continued.aspx.