Tsat
ni Emmy L. Masola
Ting! Naghuni ang silpon ni Bikay. May minsahi sa anang Facebook. Nakasulat sa Ingglis.
Bryan: Kamusta, palangga ko?
Bikay: Mayad man. Salamat.
"Ay, Bikay, kon dyan lang timo sa atun, pinakamaadung-adung mo nga mapamana si Gunding mananggiti," komintar ni Sana nga anang amiga. "Kon wara takun magbantay ka kompyuteran ni Iyay Nining sa banwa, wara tamun magkilalahay ni David."
Nakapamana si Sana kang kano kag sa Amirika run nag-istar. Ang balay da nga daw malup-og sa kagabok kauna, amo run ang pinakamanami nga balay sa Baryo Bakiang kadya.
“Bay-i lang hay ipatsat ko kanimo si Bryan, migo ni David,” boluntaryo ni Sana.
Rugto nag-umpisa ang tanan. Sa idad nga baynti-singko, nagaparapangita run man si Bikay ka paraman-un. Haros adlaw-adlaw tanda nagatsat ni Bryan. Mapinalanggaun si Bryan kay Bikay.
"Sana, mayad man ra si Bryan?" Bisan namayha, ginpangisugan gid ni Bikay nga pamangkuton ang amiga hay indi run tana makaturog ka paminsar sa lalaki. "Daw sa hadluk ako magpakita ka bug-os nga pagpalangga hay basi matupa lang sa wara."
"Amigo ria ni David,” paathag ni Sana. “Indi man siguro mag-amigo ang bana ko ka malain nga tawo."
Ting!
“Ano ruman ginapiripiri mo?” pamangkot ka lola ni Bikay nga si Kunsoy. Nangil-ad gid ang mal-am kay Bryan. “Anhing itum pa sa buli koron hingodhingod na kara tapos bahitun na lang kaw kag dar-un sa anda para himuon nga uripun! Ay, maan, Rebecca, pagpamuslu.
“Sakit man timo maghambal, Lola, ba,” sabat ni Bikay. “Tawo man ria nga may baratyagun.
“Nugayi takun ka barabaratyagun nga ria, Rebecca,” padayon ka mal-am. “Pamati bala sa radyo hay tuay hud, mga tawo nga ria nagaparangsawa ka Pilipina para makaagto sa Pilipinas kag magnigosyo ka droga.”
“Maan, Lola, nasobrahan lang timo ka pamati ka balita sa radyo.”
“Ay, ti, ibalita bala ria kon bukut tuod?”
“Ti, mayad man si Sana haw, nami run kahimtangan nanda magpamilya,” rason ni Bikay.
“Ah, ti, kon indi kaw magpati, sunda gusto mo. Sabagay, mal-am kaw run man. Wai ko takun,” pangampo ka mal-am.
“Basi gid man tuod ang hambal ni Lola Kunsoy,” hani ni Bikay sa kaugalingun.
Umpisa kato, daw nalas-ay si Bikay kay Bryan. Naglaka ang andang pagtsat hasta nga nadura run gid. Nagpakuribung lamang si Bikay kag naghugud sa anang pagpanudlo.
Pagkaligad kang darwa ka tuig, nakabaton tana ka tawag.
“Bikay, si Bryan dya. Gusto ko nga maman-an mo nga wara ako ti ginpalangga nga iba nga babayi, ikaw lang. Gintinguhaan ko nga magbag-o hay plano ko nga pangasaw-un ikaw, ugaring ginpakamalain ka mga imaw ko sa nigosyo ang akun pagbag-o. Gintudlo nanda ako sa mga otoridad.”
Natakup ang tilipono nga wara maintyindihan ni Bikay ang buut hambalun ni Bryan. Nahangpan na ang tanan kang nag-uli si Sana sa Pilipinas imaw ka anang mga kabataan. Gingaroti sanday Bryan kag David bangud sa anda pag-imaw sa sindikato ka mga nagabaligya ka droga sa bilog nga kalibutan.
“Ti, nagsala bala ako?” pamangkot ni Lola Kunsoy sa apo.
Nagatarabiris nga luha gid lang ang nasabat ni Bikay.
- Katapusan -