Tinanuk nga Mais
ni Emmy L. Masola
Nagadagun-dagun si Helen pabalik sa anang purungkuan sa opisina. Kaina pa ka aga ana tariya sa lain-lain nga bilding sa syudad. Daw nabuta ka lap-ok ang gaharapdus na nga kahig. Ginhubad na ang anang sapatos.
Sa pihak nga bahin .…
“Hmmm, hamot tinanuk nga mais ba,” muno ni Irong.
“Tuod? Eksayted run ako ba maggaling kang kada kilod ka mais,” raguok ni Busong.
“Paghinugay, Busong. Indi kaw gid lang kaisrot maggaling kon indi ko mausap pro,” laghung ni Onto.
“Ay, Onto, bisan ano mo ka usap kon indi ko pagdapnan, wara gid ti hinaputan inusapan mo,” komintar man kang indi magpapyirdi nga si Laway.
Si Dila, wara ka pugung kang ana baratyagun, “Ay, Laway, bisan dapnan mo pa ang mais, kon indi ko pag-iwaswas ang mais, indi ria mausap ka mayad.”
“Dila, tak-an kaw gani waswas, dis-ug mo dayon kay Tilaok, ha? Para dasig makalab-ot kanakun ang mais,” ang indi maributay nga sabat ni Busong.
“Dali-daliun mo ay gawa, Busong, hay wara run dya ti nagasurup nga pagkaun kanakun. Wara run ako ti iparuros panagtag sa bilog nga kalawasan nga dya,” sugpon man ni Tinai Gamay.
“Pssst, Tinai Gamay, kun-a si Busong nga hagan-haganun na lang paggaling para ang hangin indi magburon-buron kag makirikid-ul nga magwa kanakun. Kapoy man bay magtukapan. Kapin pa, wara gid takun nalipay sa dapug ka hangin nga ginapasab-og kanakun ni Busong,” reklamo ni Buli.
“Mayad timo haw, Buli, ako basulon mo? Raay si Surok-surok mulaya hud. Wara ti iba nga ginahimo ra kondi manipon ka hangin kag sipal-sipalan. Sa kagahud ka pahuni na nga hangin, daw sinas nga ginatadag. Kis-a ako tana ginapasibangdan,” rimpwal ni Busong.
“Ah, ti, daw medyo raku run napanipon nga hangin ni Surok-surok hay kaina pa nga sipal ana. Pag-agi ra kar-on ka mais, abaw, sampat gid! Makirinapol gid ang hangin sa mais tapos barurunon ni Busong kag padugaun para masurup ni Tinai Gamay. Dayon, amo ra ang makatalagam nga hitabo para kanakun: matiriyabaw pagwa ang hangin kon mag-agi kanakun,” panghakruy ni Buli.
“Wara’t patay panghakruy tana imo obra pirmi, Buli. Amo nga baho gaaragi kanimo hay. Pirmi lang timo kirimudon kag panaghoy. Sunda bala ko, bisan baho gaagi kanakun nanamitan si Dila, nalipay si Busong, gapalakpak si Tinai Gamay. Ti, sadya lang. Tinguhai man abi isli paminsarun mo ngara, Buli. Basi pa lang pag-agi ni mais kanimo, daw binangto lang gihapon dapug na,” laygay ni Baba kay Buli.
“Sakto tana imo ra, Baba. Pasalamat gani ra raad si Buli ginaagyan lang tana. Akun gani ginaistambayan gid ka mga gabalingaso nga tinuga. Bantayi bala kar-on ang mais, dya ruman ra kanakun mapaamulya kag maghulat ka turno na pagwa,” sugpon ni Tinai Bahul nga kaina pa wara gatimuk-timuk.
“Irong, diin run to kuon mo nga mais man? Kabuhay, ah!” singgitan ni Surok-surok.
“Paghiripus kamo. Kagahud nga kaina pa ko dya gapirung-pirung pro,” panggasud ni Mata. “Ano nga mais ginawakal nyo? Wara ti mais. Sapatos ni Helen tana nahaklu ni Irong ngato.”
- Katapusan -