Swerte
Emmy L. Masola
May nagbukas ka gawang kang kapihan. Gwapo, tisoy, nami ang tindug. Dayon may nagsulud nga bayi. Gwapa … si Nina!
Ginbutung ka laki ang purungkuan. Nagpungko si Nina. Nami ang yuhum. Ginkuhap ka laki ang pino nga supat ni Nina kag ginharkan sa dahi. Ginbuul ni Nina ang alima ka laki kag ginhagkan.
“Pinalangga ko nga prinsisa, pungko lang ikaw dyan sa imo trono. Ako ang bahala sa mga paborito mo. Todo sirbisyo ako para kanimo,” binalaybay ka laki kag dawa duko sa anang halangdun nga prinsisa.
Ang prinsisa, nakunyag kag nagpahabug kang matam-is nga haruk sa anang prinsipi. Nagdiritso ang laki sa barista para magbakal. Andut nga sangka irimunun kag sangka pagkaun lang ang ginabitbit na?
Pagbalik sa lamisa, nagduko liwan ang laki, kag ginsirbi ang tinapay kag irimnun nga paborito ni Nina halin kang gamay pa. Ginplastar ang darwa ka stro kag gin-umpisahan kihad ang malum-uk nga tinapay. Karot keyk. Paborito ni Nina hay kuno manamit run, masustansya pa. Kon magkaun kuno ka karot masiga ang mata mo. Tuod gid man, ang mga mata na, daw pirmi lang gasiga, pirmi buta ka kalipay bisan pa nga may mga tion sa ana kabuhi nga daw malumus tana sa mga problima.
Ginhungit kang prinsipi ang anang prinsisa kag nagbalus man hungit ang prinsisa. Tapos, dungan nanda gin-inum ang irimnun: sangka baso, darwa ka stro. Nagtabuay ang mga mata nanda. Makita sa bayhun ka prinsisa ang hugut nga pagpalangga sa anang prinsipi. Nanultol ang alima ka prinsipi sa malum-uk nga alima ka prinsisa.
Nag-untat ang pag-inum. Nagturukay ka buhay ang bayi kag laki. Turukay nga buta kang pag-angga, buta kang paghigugma, buta kang kalipay. Nag-umpisa istorya ang bayi, wara gauntat. Ang laki amo man nga pamati kag wara’t untat nga harakhak. Hasta nga pariho tanda nagaruk-uk ka kadlaw kag nag-umpisa dugsing. Naglab-ot sa palhitanay ka keyk sa pungyahun. Nadaran ang bayi kag nasobrahan ka palhit ang pungyahun ka laki. Nag-untat ang karadlawun ka laki kang daw nasobrahan ang tap-ing, nagduko.
Daw natapungawan ang bayi. Mahinay nga ginkaptan ang pungyahun ka laki kag sarasara ginharkan ang kada tap-ing nga ana ginpalhit. Nagbukad sa anang bag kag nagbuul ka tisyu. Ginpahidan ang keyk nga ginpalhit kag ginharkan liwan ang laki. Nagyuhum ang laki kag ginsabat na kang sangka malawid nga haruk. Pati ang subay, daw namayha magparapit sa darwa hay basi madisturbo.
Piro nahangyus ang bayi kang may ginpagwa nga singsing ang laki halin sa anang bulsa. Himo sa bulawan kag may malahantak kabahul nga dyamanti nga tampuk. Ang pagkahangyus sa pungyahun ka bayi, nalumus sa indi mabakal nga kalipay. Daw adlaw nga nagasirak si Nina. Buta kang kalipay .…
“Pariho kang gamay pa kami nga nagasipal kang balay-balay. Si Nina ang nanay, ako ang tatay,” ang hanihani ni Carlo sa kaugalingun, dayon gwa.
Binayaan ni Carlo ang kapi nga wara’t buhin hay nabanga ka turuk sa dugsing kang laki kag bayi – si Nina, rayna kang anang tagipusuon nga buhay na run ginasagap kag ginakahidlawan.
- Katapusan -