Salamat, Otoy Bantog
ni Ernesto L. Lasafin
Sa Sityo Katugisan, Otoy Bantog ya hayu kana ka lolo kay Herodotus Bantug, walo ka tuig. Popular tana tay Otoy. Bantog hay kun daw ano ya kasabad tay Otoy maw man tana kasadya. Nag-Grade II dun si Otoy hay anang maestra sa Grade I tiya na nga libayun kang nanay. Indi mangu tay Otoy pay matamad magtuon.
“Ya tanan nga bagay nga makita ninyo sa palibot kag mabatyagan noun ukon ngaran. Halimbawa, kanding, karbaw, miyaw. Otoy, ano pa ya makita mo nga noun sa palibot?” tukso ka maestra.
“Mam, insa ako gid imo pangkuton, haw?” kusmod ni Otoy.
“Otoy, isara pa gid ka kanding nga libay,” hutik ka amigo.
“Isara pa gid ka kanding, Mam,” ginsabat ni Otoy. Nag-utuy-utuy kadlaw ya ana mga klasmit. Pati maestra nagkadlaw.
“Mam, me ay go awt?” nayha tay Otoy. “Balusan ko gid timo, karon sa gabii.”
Nagahanda sa salas ya anang maestra ka inugtudlo pagkaaga. Nagpwesto tay Otoy sa kilid ka bintana. Hinuyup ya bagakay nga daw tayhup. Tatlo ka bilug nga kuto halin sa libayun ya ginbala na sa tayhup. Nagsentro gid sa buhok ka anang nagatalikud nga maestra. Dayon dalagan tay Otoy. Marayu dun kag madiparahan kang maestra. Pay wara tana kamaan nakahugpa dun sa ulo ya gutum nga mga kuto. Burubuhay nangaruskos kang ulo ya maestra. Mayad lang hay wara it nipay tay Otoy gani kuto ya nadumduman.
Wara dun tay Otoy nag-eskwela hay bisperas ya Byernes ka pista sa Sityo Hinilumhuman nga ingud man ka Katugisan kag Igkadyos. May bayle sa gabii, kundi may bisita dun anang lola sa Hinilumhuman. Duro abi ya mga apo nga daraga kag soltero, ti kundi duro man bisita nga mga tin-edyer. Makakaun duman tay Otoy it manamit nga ihapon sa balay ka lola.
“’La, diya dun tay Otoy,” panugid kang kaedad ni Otoy nga pakaisa.
“May matabu duman nga masadya ka dya,” natugda dayon kang manogtin-edyer nga pakaisa ni Otoy.
“Otoy, kauyon kaw ka dinuguan kag puto?” bugno ka lola kay Otoy.
“Lola Estring, pasyente lang ya ginapamangkut,” maabtik sabat ka apo.
“Ti, ano pa atake dun to sa lamesa.” Daw alas kwatro nga tren tay Otoy nga ginpwestuhan ya dinuguan kag puto.
Darwa ka pakaisa nga soltero ya nag-abot. Nakaundang dun tay Otoy.
“Bati ko, Greg, wara kaw ginasapak ni Pat,” bugno ka bataun.
“Suplada, pay ti imaw kami sa Katugisan Elementary School, diin gid tana maagto?”
“Si Nang Pat, may imo kaw karon sa gabii,” pinsar ni Otoy.
Pagsugod ka binayle nagpwesto tay Otoy sa may buho ka amakan nga kudal ka baylihan. Iti ka manok ya bala ka tayhup na. Si Greg kag si Pat nagahambalanay sa sulud baylihan. Hinuypan ni Otoy ya tayhup, sa abaga ni Pat naghugpa ya iti!
“Mauli ako anay. Ilisan ko ya bayu ko.”
Gin-ibhan ni Greg si Pat. Pay may pulis nga wara tsapa kanday Pat.
“Gregorio, paagtunon mo diya ya tatay kag nanay mo!” ngurub kang tatay ni Pat.
“’Ga, salamat kay Otoy!” hutik ni Greg.
- Katapusan -